通常食自助餐有兩個原因，一係醫肚，二就梗係可以用最低價錢任食貴嘢。平時貴夾唔飽的日本料理，家陣唔只可以任食，而且重有成一百款美食任你點，價錢都唔使二百蚊，各大胃王又點可以錯過？！今日就等日式自助餐FansCathy，幫你精挑細選幾款貴價必食之選，等你可以「食」回票價。
記者：黃婉冰 攝影：陳穎 Imagegirl：Cathy
由於製作需時，所以很少日式放題會有手卷供應，但這裏就有共十一款可供選擇，當中海膽手卷最搶手，即叫即捲，紫菜唔會韌，海膽亦唔會變水。除海膽外，另有吞拿魚、蟹子沙律手卷，材料足，生熟俱備，必有一款啱心水。
海膽好新鮮，味道夠鮮甜，飯粒軟硬適中，唔會過於黏口，又唔會過分硬，飯同醋分量啱啱好，我最多就可以食兩件。
人客可以自己選擇要炸蝦天婦羅還是雜菜天婦羅，絕對唔會一碟又蝦又菜的情形出現，劃清界線，讓食客可以專攻自己的心頭好，蝦迷就當然唔可以錯過炸蝦天婦羅，一般食肆三蝦四菜組合成的天婦羅平均要六、七十蚊，呢度唔使計住食，可以食得更暢快。
蝦幾大隻，外面層天婦羅炸粉唔會厚叠叠，分量適中，蝦肉爽，有蝦味，咁好食，我最多可以食六隻。
來自日本的雞骨腸，放在爐上燒香，淋上燒汁，頓時變得惹味香口，送酒佳品。多春魚燒得外香內滑，毋須加任何調味料輔助，一樣夠味，鮮味十足。
外層煙韌，食落有些少似台灣嗰隻燒豬肉腸，香腸幾惹味，但油分稍多，頂多食兩條就夠晒數，多春魚燒得香脆，唔會腥，食半打都唔成問題。
店方別具心思，四人或以上惠顧而其中一人生日，店主會送出用三文魚生、吞拿魚、蟹子等做成的壽司蛋糕（分量因人數而定），同朋友慶祝生日就至啱。另有十款手握壽司，鰻魚、頌魚、甜蝦、熟蝦、北寄貝及其他，款式每隔一段時間轉一轉，令你口味一新。
魚生新鮮，分量同平時日本料理店一樣，三文魚同吞拿魚刺身夠大片，蛋卷略甜但都算滑。
平時食日式鐵板燒，每碟大蝦就要近百元，呢度任叫任食，唔食番夠本點對得住自己？新鮮海蝦剝殼用牛油香煎，再補上牛油芡汁，師傅話以牛油汁代替燒汁，味道較清，唔會將蝦味掩蓋。
大蝦聞落有好強牛油香味，蝦肉爽口，但不宜食得太多，如果唔係會好易膩。
六款刺身分別有三文魚、吞拿魚、北寄貝、八爪魚、甜蝦及較少有的頌魚，全部一落柯打即切，唔會擺到由凍變熱。甜蝦、頌魚一上場已名列榜首，師傅揀選日本最大隻的甜蝦，鮮味爽口，頌魚身價比三文魚貴，味道與油甘魚接近，脂肪比三文魚少、味清淡，與甜蝦同屬必食之選。
甜蝦刺身最正，肉質又爽又滑，又夠新鮮，而其他魚生都係即叫即切，唔使擔心上碟時會霉晒。
電話：28279808
地址：灣仔港灣道28號灣景中心1樓3號舖（華潤大廈側）
座位：110個
營業時間：上午11時半至下午3時，晚上6時至11時。
付款方法：現金及信用卡（Visa,Master,AE）
收費：成人每位$188，小童每位$94，另每人奉送汽水或日本啤酒一罐及日本雪糕一杯，四人或以上惠顧另奉送清酒一瓶，八人送兩瓶，餘此類推。
供應時間：星期一至日下午6時至晚上11時，最後落單時間為10時半。