財爺於預算案中曾表示要發展本土經濟，曾經令阿虎以為佢會再搞高地價政策，點知佢竟然話要搞商販，即係叫多啲人做小販。當然，如果阿虎失業又無計可施，都會諗吓做小販。不過，就真係冇諗過阿松會諗埋呢啲屎橋。
目前負資產個案隨樓價下調而愈整愈多，重邊個有心情去消費呢？多一批小販咪變相累班店主捱貴租，而且小販淨係識畀陀地唔識交稅，阿松你真係諗清楚至好。香港樓價唔升，負資產問題唔解決，本土經濟休想翻身。
瑩輝集團（1163）噚日傳出公布業績後就會配股，集資約1億元，不過噚日重未有動靜。據講公司將於今日見證券界，做多一輪吹水工夫，然後再重整股價走勢，跟住至會配股。此股公布去年賺7703萬元，倒退5%，每股賺17.1仙，PE只係5.5倍，今年重有復甦概念，現價配售重有一定吸引力，不過炒高先至配股就要諗諗。
合和（054）近期由5元樓下升至高位6.90元，升勢可謂強勁，但點知廣東省傳出將統一路費計算方法，將影響合和旗下廣深珠高速公路收入，導致合和股價連續兩日下挫，累計跌幅逾11%，差唔多跌破上升軌底部。Cookie話，如果呢個問題唔能夠擺平，相信芬佬會繼續沽貨，暫時咪亂撈底。
中東局勢日趨緊張，如果美國真係打伊拉克，相信油價會急升。油價噚日一度升破25美元，油組雖話明可以增產控制油價，但石油股仍可短炒一轉，中石油（857）與中海油（883）噚日分別升0.64及3.9%。