近年全世界掀起一股懷舊家具熱，初頭懷疑是大家無錢消費，不如擔張櫈返家吹水，誰知此風愈吹愈盛，潮流之士追求自己身上物有型外，更講求生活品味。「有型」年輕人背誦Designer瑯瑯上口，嘴邊「Eames」代替了「Ape」。始終買咗對ForceI人人睇到，買咗張Panton唔講邊有人知?!追潮流多少虛榮，記者們心態相若唔寫點有型，買本書揭揭人人都開筆。
aluminium3年多前在蘭桂坊開設第一間樓上舖，到如今兩間地舖，正是此浪先鋒，見證潮流家具市場平民化。新店今季力谷的胡桃木（WalnutWood），歷數十年時間驗證，係咪潮流又有何重要。
記者：何兆彬 攝影：陳盛辰、何兆彬
Series-7，大師ArneJacobsen最著名作品之一，也是被抄襲得最多的一款，其實生產量龐大，相當平民生活化。設計簡單，配以管狀鍍銀櫈腳，但流線身形可媲美任何美女。初期以柚木製成，後來推出彩色塑膠版本。至去年再推出這胡桃木版本，講真要比膠板有氣質得多。（$2,999）
開新店梗有新意思，主題係「GoNut,Walnut！」。早兩年60~70年代膠家具膠Product大行其道，全世界都講SpaceAge，之後《Wallpaper》等Lifestyle雜誌齊力煲50年代木製家具（當時塑膠技術仍未出現）。02年主角是WalnutWood（胡桃木），同樣Retro，比塑膠低調，但硬淨而溫暖。年長讀者當記得那深啡木紋，話你知，本人細個屋企全部家具都係呢隻色，只不過唔係胡桃木，而係防火板。
HansSandgrenJakobsen作品，獲獎無數。遠看似件HenryMoore的雕塑，櫈身以原塊胡桃木挖空，極具北歐風格。坐法自由，打橫打掂騎住都得。（$2,599）
從前設計過梳化大受歡迎，今次乘勢推出胡桃木矮櫃。特別在中門由上往下翻開可平放地下，此懷舊設計為方便阿爸輩放置黑膠唱盤、酒櫃等。（$5,999）
ArneJacobsen（1902~1971），丹麥人，公認為20世紀最有影響力家具設計師之一，其實瓣數甚多，本來修讀建築，二次大戰時設計過牆紙，而其餐具?刀具設計亦甚著名，不過以家具作品最經典。受世紀初CharlesRennieMackintosh的影響，風格簡潔重幾何形狀。上面張7號仔就係佢傑作。剛過去的2月11日是大師100年生忌，丹麥正舉行大型展覽，大師作品當然又再熱番。
ArneJacobsen另一張名椅，與天鵝椅（Swan）同樣經典，雖然一直覺得兩者都唔係咁似蛋同天鵝，但包圍式設計坐落去被張椅包實，可想像有幾舒服！（$29,999）
Habitat廠連鐘都用上胡桃木。留意兩個胡桃木圈中間以透明膠圈分隔，把重量減輕又充分發揮「正負形」，掛白牆上啡白分明，咁先叫簡潔。（$299）
史上最著名的DesignerClock之一，日本人瘋狂喜愛。工業設計家GeorgeNelson1949年作品，Chronopak系列之一，球形連支設計靈感來自原子科學（上過Physic堂見過原子模型吧），此作預示了設計界引入科學元素的趨勢。（$1,999）
aluminium數月前取得瑞士Vitra廠代理權。Vitra為家具界老大哥，長期邀請著名設計師合作，代理後價錢較親民。Panton椅都係千幾蚊，好過買多對巧立名目的貓貓×狗狗版波鞋。
店址：aluminium（25774766）
銅鑼灣京士頓街8號D舖