股海實戰錄:新地營造頭肩底

股海實戰錄:新地營造頭肩底

中移動(941)同滙豐(005)上周五喺外圍造好,噚日早段帶領港股上升,中移動最高升至25.55元,午市公布業績,雖然盈利升55%,係市場預期上限,但APRU(每月每戶平均收入)大跌,加埋冇息派,結果搞到倒跌收場,收24.85元。
中移動噚日雖然公布完業績後下跌,但唔少大行放風話可以吸納,因此短期就算唔大升,照計亦唔會大跌。趙飛雲唔鍾意呢隻股,主要係嫌佢太多突發消息影響股價,並非因為前景差。

新基2.3元有支持
講起前景,太平協和(438)上海地產業務前景唔差,但近期技術走勢就明顯轉差,噚日收0.67元,輕微跌穿50日線(現處0.675元),短期如果唔能夠抽番上去,惟有先計數。
倉內另外一隻新世界基建(301),近期走勢亦唔好得去邊,但2.30元重有啲支持,睇埋3月22日公布中期業績,就可以決定重揸唔揸。反為新地(016)噚日收63元,重回50日線(現處62.90元)之上,升近小型頭肩底頸線,如果升得穿,形態可確認,再挑戰今年1月高位72元。