李福善昨日同八方講，自己對家族的認識唔及秦家聰十分之一，好多家族資料都係睇到秦家聰本書先知，好似全靠第一次世界大戰英國船隊被徵召，先祖李石朋先得以靠船運起家，佢都唔知。李福善自己則重記得七歲由父親請家庭教師講論語，十一歲受教於滿清翰林之子，細個都好乖，否則就會被老師扑頭。
而李福和一見記者，就急不及待話本書出錯佢個名，要「鬧鬼佢（作者）！」。原來一張八二年佢同一眾行政、立法局議員見戴卓爾夫人時的合照，寫錯為李福樹。呢張相重有段故，話說戴卓爾女權至上，硬要李福和等男士讓鄧蓮如由旁邊位換到中間，靠邊站的李福和回港後頻頻被問發生乜事，只好話「我都唔想㗎！」
本書重出現咗一個同李家毫無關係的人──胡紅玉，胡是秦家聰太太，本書第一頁就寫住「獻給胡紅玉」。兩人二十多年前一齊組織觀察社認識，經過十幾年愛情長跑先結婚。秦八十年代任華爾街日報駐京記者期間，兩人分隔兩地，終成佳偶。
E-mail：