常言道「富不過三代」，不過香港至少有一個大家族例外，就係包括李冠春、李福善、李福和、李福兆、李國寶、李國章、李國能、李志喜……在內的李氏家族。
資深傳媒人秦家聰寫的《香港名門──李氏家族傳奇》中文版昨日出版，作者講到十多年前立志寫一部香港史，但諗嚟諗去，只有從十九世紀中香港開埠始，延綿六代、人才輩出的李氏家族先夠資格作代表。於是由八七年開始，用咗十幾年同多位李氏家族中人訪談，至九九年先寫成李氏家族傳奇英文版，今年再出中文版。
李家可追溯至二百年前鶴山維墩村出生的李家成，冇錯，此「成哥」同彼「誠哥」同音，但呢位成哥有三個老婆三個仔，細仔李石朋在香港以航運業起家，李石朋有九子六女，其中三個仔一齊創辦東亞銀行，又以大仔李冠春一支最巴閉，後代有李福善、李福兆、李國寶、李國章、李志喜等，而李石朋三仔李子方都唔弱，有李福和、李福逑、李國能等後人。
秦家聰說百多年前的資料很難翻查，要遠至歐美搜尋資料，才找到收藏於法國一家圖書館的越南中文報紙，記錄當年李氏於越南西貢開銀行的資料。
呢本書資料鉅細無遺，由李家成留畀每個妾侍幾多錢、李國寶留學劍橋時點樣開夜總會兜生意、李福善同個女李志喜點樣一邊揸車一邊爭拗民主，八方都睇到津津有味。秦家聰係宋代大詩人秦少游後代，曾經寫過《秦氏千年史》，寫家族史當然拿手。
E-mail：