喺最近舉行嘅日內瓦車展上，寶馬車廠展出咗一款名為CS1嘅概念開篷車；此車除造型突出吸引、車廂布局極富前衞High-tech感外，佢嘅性能表現重一啲都唔差㖭。
先從外形方面說起，CS1概念車可謂突出吸引，除身形嬌小玲瓏外，頗有神氣嘅頭燈組合，加上獨特嘅車首造型，因而令其擁有一分攝人嘅魅力；加上佢嘅開篷設計，亦可增強車子本身嘅吸引力。然而，全新CS1概念車雖然車仔細細，但佢嘅車廂空間卻來得十分充裕，配合全新設計兼承托力極高嘅座椅，乘坐舒適度十足；車廂設備配搭又見齊全，各項設備如高級音響、原廠冷氣等等都一應俱全，使用時又見方便。而廠方亦預算會為CS1配用一台1.8公升引擎，馬力輸出達115匹，配合一套SMG半自動波箱，以及四輪18吋輪胎組合，因而令新車可有不錯嘅性能表現。若此車能正式投產的話，相信定能惹來不少車迷垂青㗎。