老友記退休，唔使返工，得閒到極，以前食飯成日望表，要準時鬆人返公司開會，現在就慢慢嘆，左丁山反而要急急腳走先。走返寫字樓寫稿之際，接到老友記電話：「喂，搭電車一程幾多錢？」左丁山答：「兩蚊！」五分鐘後，老友記又打電話嚟：「喂，八達通可以去邊度增值？」左丁山為之愕然，答：「七十一啦、地鐵站啦。」
次日再喺畢打街碰到老友記做緊windowshopping，於是捉住佢問：「喂，你噚日問我啲無聊嘢做乜鬼？」老友記大笑：「我喺中環返工三十五年，二十年前已經有公司車接送，放假就坐老婆架車，荒廢咗個車牌好耐咯，一時唔敢揸車住，改用電車巴士地鐵，發覺好鬼方便，但我腦袋已經與平民生活脫咗節，唔知搭車要幾多錢，所以要問你！」老友記做慣總裁，成日講公司re-engineering，增進效率，退休之後，原來佢嘅私人生活要徹底re-engineering，𠵱家先至明白老婆每日嘅在家「工序」，兩口子現在更多溝通，可能更加恩愛㖭。
仔大女大，嫁人遠去之後，退休人士過番二人世界，初初當然係周圍去旅行、玩番夠本，六七個月之後就會覺得攰，要唞番一段短時期。如是者第一年好快過，第二年又點呢？睇怕冇番一兩樣嗜好，兩老打發日辰都幾傷腦筋；退休有「三老」，老伴、老本、老友齊全，自不然精神愉快，身體健康都會好啲，至於三老之中，邊樣最重要？見仁見智咯。