這檔位於鵝頸橋街市，毫不起眼的大牌檔，父女兩代由1946年的街邊檔經營至今，同樣是虔誠回教徒，不賣豬肉，五十六年來都賣着同樣的菜式，當中的掛爐鴨及咖喱羊腩更是賣得街知巷聞，問老闆娘怎樣可以56年不變，日日爆場，很簡單的回答：「最緊要用料新鮮，真材實料。」想知有幾好味？就等在座食客話你知！
記者：黃婉冰 攝影：陳穎
這裏的掛爐燒鴨由當日街邊大牌檔賣到現在，平均每日賣出二十八隻，鴨每日新鮮運到，每次只會燒幾隻，務求保持新鮮及溫度，由於做法與普通燒鴨不同，所以味道亦有異，基本上以清淡為主。
馬婆婆試味報告：「鴨肉好腍，味道清香，鴨肉味無雞肉咁濃，淡而清甜，味道調校得好好，我都係回教徒，對佢有信心，幫襯咗幾十年，好啱我口味。」
回教徒禁食豬肉，所以店主以雞代豬做鮮蝦雲吞，馮師傅表示，回教徒殺生前一定要祈禱，唔可以用急凍肉，所以全店所有鴨同肉都是新鮮，雞肉起骨切粒，連同鮮蝦加少許調味如鹽、蝦子調味，一切以清淡簡單為大前提。
試味報告：雲吞明顯比一般較為清，沒有濃濃的蝦子味。雞肉味及不上豬肉般甘香，但有鮮蝦互補不足，食落的味道同普通雲吞差不多。
$18（小）
另一鎮店招牌菜咖喱羊腩，選用新鮮羊隻斬件，用自家秘製咖喱汁燜至入味，薑茸和蒜茸再加其他香料令咖喱汁更香之餘，同時亦可將羊肉的羶味掩蓋，羊腩連骨，雖非啖啖肉，但就似足本地人喜愛的羊腩煲，唔太辣但香味濃，這正是咖喱的吸引之處，難怪蔡瀾都捧場！
哈婆婆試味報告：「咖喱好正宗，羊腩煮得好腍但又唔會又霉又散，咖喱汁都唔係好辣，味道幾好。」
還以為鵝腸與一般大牌檔無分別，但原來淋在鵝腸上的並非豉椒汁或是普通滷水汁，而是燒完掛爐鴨剩下來的精華──燒鴨汁。雪白鵝腸以極速灼一灼，再淋上鴨汁，食得咁刁鑽，難怪可以日賣30碟。
試味報告：掛爐鴨汁有鴨肉香，又有淮鹽的惹味，香味與滷水汁截然不同，用來灼鵝腸就自然更加爽脆甘香，大廚手勢功不可沒。
柚皮沒有一身古銅色，全因大廚只用上湯煮，無添加整色整水，上湯只用魚、鴨骨、雞骨、蒜頭熬成，清甜為主要元素。柚皮本身有苦澀味，所以每次都要過足三次水，再加鹽不斷搓，將苦味迫出，撒上鹹香蝦子，就成了一道傳統又簡單的家常小菜。
試味報告：柚皮沒有苦澀味，取而代之的是蝦子香和鮮甜的上湯味，柚皮腍得入口有溶化的感覺。
一般人(包括記者在內)都以為掛爐燒鴨又即是燒鴨，但查實無論做法到味道都各有不同，今次就等記者帶你睇吓師傅燒製掛爐鴨嘅過程，咁以後就唔使食完都唔識分！
店名：惠記清真食館
電話：25741131
地址：灣仔寶靈頓道鵝頸熟食中心2樓5號檔
座位：約150個
營業時間：上午10時至下午6時
付款方法：只收現金