據人造衞星探測，有三個來自外太空atmo星球嘅精靈已經抵達地球。消息透露佢哋唔係要侵略地球，而係嚟感受2002年世界盃足球嘅氣氛，同埋擔任今屆世界盃嘅吉祥物。為首嘅黃色大精靈阿托（Ato），除咗帶同藍色小精靈尼克（Nik）同紫色小精靈卡茲（Kaz）外，更帶埋一大堆世界盃精品，包括公仔、手表、衣服等，實行要同地球朋友玩得開開心心。
記者：張穎倫
攝影：周旭文
ImageGirl：Sukia
咪睇小阿托生晒角全身黃色好怪相，其實佢係atmo星球王子兼兒童足球教練，所以佢球技精湛。呢啲公仔咁矜貴，全因身形夠龐大，阿托身高66cm，在市面難得一見，等你可以同佢猜兩球都得。而尼克同卡茲兩位小精靈就身高53cm，跟足比例最啱抱佢入懷，最緊要係全部都係限量版，每款全球只生產2002隻，象徵2002年世界盃，夠晒珍貴。
售價：
阿托$329
尼克或卡茲$299
（崇光）
呢套紀念章有齊歷屆世界盃冠軍隊伍，包括四屆盟主巴西、上屆冠軍法國等，重有韓國、日本兩個主辦國，加埋精美木盒，日本嗰邊一出就賣晒。𠵱家輪到香港版正式推出，更為香港人度身訂做，加埋首次晉身決賽周嘅中國隊。同樣限量2002套，每套都有證書兼刻上編號，據知唔少內地遊客都買套回鄉，以支持國家隊。
售價：$480（崇光）
唔少人都會以為今屆世界盃嘅球星卡都會由日本呢個主辦國負責，但估唔到製造權落咗喺意大利最出名嘅PANINI手上。全套171張卡，有日本、法國、韓國、意大利等球員嘅詳細資料，出生日期、體重、所屬球會等無一或缺，更有埋舉行場館以及領隊、教練卡，每包6張，球迷一定鍾意。
售價：$36（K-Store）
大家可能會覺得adidas推出嘅世界盃足球，太大個又硬淨，啱大人唔啱細路仔。若想同小朋友踢波的話，呢個迷你軟足球就最好玩，色彩鮮豔之餘，更印上尼克、卡茲佢哋嘅得意造型。包保可以培養小朋友對足球嘅興趣。
售價：$58.5（崇光）
雖則佢身價唔平，但打正日本製造同攞埋2002世界盃嘅正式授權，絕非一般翻版貨可比。成個杯都設計成足球一樣，除咗藍白色外，亦有紅白色、黑白色嘅配搭，用佢盛載飲品，真係睇波都有Feel啲。
售價：$88（禮品站）
前排精工推出咗世界盃鋼表，嫌鋼表貴的話，不妨考慮呢兩隻膠表。小記最鍾意黑色嗰款，事關佢以今屆世界盃嘅舉辦城市為主題，表面同表帶都寫上橫濱、神戶、光州、仁川等地方，令人一見就知。而白色嗰款就以歷屆世界盃得主，以及今屆3隻吉祥物做主題，睇落得意啲，但就冇咁啱大人。
每款售價：$398（K-Store）
絕大部分世界盃嘅服飾都為成人而設，難免令小朋友妒忌。所以呢件難得嘅童裝T恤就專為小朋友而設，並以成人衣飾較少見嘅三隻吉祥物作為主題。再加上領口同袖口都選用紫色邊，小朋友一定鍾意。
售價：$117（崇光）
黑色襯紅邊嘅Logo風褸，Outlook已極之醒神，畀人一種充滿活力嘅感覺。再加上內層選用疏窿纖維，非常透風，最適合近排日夜溫差較大嘅天氣穿着。不過只得大人尺碼，小朋友冇得着啦！
售價：$198（崇光）
最大賣點除咗皮製徽章夠硬朗外，人人啱戴嘅Unifit設計當然不得不提。事關可以唔理頭形大小都照戴可也，唔使調校帽嘅大小咁麻煩。
售價：$180（崇光）
除咗彈性Cap帽外，印有02年世界盃Logo嘅黑色Cap帽，亦係大熱款式之一，唔少人鍾意佢嘅設計夠簡單。除此之外，另一款卡其色Cap帽亦值得捧場，100%純棉製造，字樣只用黑色，唔誇張夠晒簡約。
售價：
黑色$126
卡奇色$72（崇光）
入貨點：
崇光百貨6樓（28338338）
銅鑼灣軒尼詩道555號
K-Store（27812760）
旺角彌敦道628號瓊華中心222舖
禮品站（23323665）
旺角彌敦道628號瓊華中心213A舖