AC米蘭禮拜日贏拖連奴都咪話贏得唔驚險。雖則話佢哋攻到對方氣咳，但如果唔係對方嗰件大塊頭盧卡利尼完場前射波出界，AC三分就難落袋。呢場波最緊張個位梗係AC教頭安察洛堤嘞，見佢喺場邊睇到眼都凸埋，又跺蹄跺爪，真係驚佢爆血管。鬼咩，AC賽前連輸四場，再唔贏佢執定包袱都得嘞。
安察洛堤其實應該要多謝復出嘅恩沙基，呢位帥哥雖然冇態，但勝在賣力同竄擾性好強。睇怕安察洛堤餘下幾場波都靠晒佢，肯定當佢仔咁錫。講開「基仔」，場波佢威就威嘞，完場前重單刀射入，興奮過度除咗衫跑去場邊慶祝，點知原來喺「老詐」，真係靚仔變儍仔。
我求大俠收到風，英國約克大學有個教授話如果球迷歌喉好，唱嘅歌又唔太高音嘅話，係有助球員發揮嘅，而喺英超聯最好歌喉嘅就係修咸頓球迷，曼聯球迷排第二，至於最差歌喉嘅就係保頓球迷。睇曼聯同修咸頓今屆表現唔錯，而保頓又表現麻麻，呢項調查又唔吹水得晒，睇嚟我求大俠都要練好歌喉，喺世界盃時為我捧嘅球隊大唱特唱先得！
意甲球隊基爾禾教練迪尼利季前答應咗班球員，球隊護級成功就會請食飯，結果當佢地喺禮拜日打和威尼斯，攞到四十二分後，迪尼利就決定今晚請客。迪尼利咁做表面好似好有信用，但我求大俠覺得咁反而證明佢個心已經唔喺隊波度，如果唔係點會喺球隊近七場聯賽未贏一場嘅時候，重去請客，搞到球員心散呢？
唉！速龍尋日又輸波，已經係近十七場輸第十六場，球隊嘅靈魂卡達近排被批評無論佢嘅身體語言同面部表情都顯示佢無心戀戰喎，卡達即時反駁，話傳媒同球迷嘅抨擊唔會傷害到佢，佢淨係在乎隊友嘅睇法，根本唔理其他人發乜噏風，咁又係，以我求驗客睇，其實佢哋唔掂要怪教練戰術保守、球員信心崩潰、卡達打法唔夠硬淨……N咁多原因，真係唔應該怪晒佢一個人㗎。
近期表現麻麻嘅王治郅喺噚日對湖人嘅比賽打咗十二分鐘，俾三百幾磅嘅奧尼爾撞到遍體鱗傷，擺明毫無招架力，點知國內啲網站大吹大擂，話郅哥「力壓大鯊魚，實打實硬碰奧尼爾」云云，睇到我求大俠都𢱑晒頭。雖然大家都喺龍的傳人，血濃於水，但係都唔可以亂吹咁離譜啩。
求驗客手記逢星期一至五刊出
E-mail: