擁有全新造型及寬敞車廂嘅新款豐田Estima（即港版Previa），自推出以來一直深受用家追捧，當中除一班年輕車迷外，另外重有一群以家庭為重嘅用家㖭；而今日《用車報告》嘅主角Philip，亦因為上述原因而選擇Estima作座駕。究竟Philip重對佢現時呢部Estima3.0有何評價呢？各位不妨留意吓喇。
記者：鄭達基 攝影：黃子偉
原因一賣相年輕富吸引力
職業為律師，並曾以歐洲車款作座駕嘅Philip，點解喺更換座駕時會選擇豐田Estima呢？據其表示，自己本身一向都係家庭觀念頗重嘅人，所以喺選擇新座駕時，亦要以方便家人為先，並希望佢哋能夠有一個舒適愜意嘅旅程享受；另外Philip又覺得新一代Estima嘅造型，除較前變得年輕富活力感外，更能予人有突破之感，加上Estima響車壇亦頗有名氣，故此Philip便於去年6月，以接近40萬嘅價錢，購入現時呢部Estima3.0作座駕。
原因二空間寬敞合家庭用
Estima除外形吸引到Philip外，就連寬敞嘅車廂空間及實用嘅設備配搭，亦係令Philip對其心動嘅原因；正如前文所述，Philip揀選新座駕嘅首要條件，就係要令家人能享受到一個舒適嘅旅程，而Estima就正好符合佢嘅要求，加上車內座椅靈活多變，更可將車廂變成流動會議室，又或者係郊遊玩樂時不可缺少嘅休息地方，兼且重有唔錯嘅視野範圍，從而令Philip一家可享受到更舒適嘅乘車環境。性能表現方面，Philip認為新車一台3.0V6引擎動力輸出充裕，配合一套4前速自動波箱，令其性能表現甚為出色。
缺點離地距較高減低彎路舒適性
縱使Philip對佢嘅Estima評價甚高，但仍有部分地方仍然感到不大滿意嘅，當中包括原廠胎軨尺碼較細、車子離地距太高，因而令過彎時或會有搖晃嘅情況；另外原有雙天窗所採用嘅物料，會令陽光直接照射入車廂內，因而令車廂溫度上升。但Philip認為，若廠方能為Estima改用較為闊大嘅胎軨、將車子嘅離地距調低，同埋改用茶色玻璃作為雙天窗嘅物料的話，就能夠徹底將上述問題改善過來。
Philip認為富利堡汽車所提供嘅售後服務，表現能令其感到滿意。除有如各大代理，能為用家提供首年免費保養（除損耗性零件外）之餘，隨後第2至第4年，用家喺富利堡嘅維修中心，進行保養服務，則只需付零件嘅費用及基本檢查費便可。
豐田Estima3.0規格
引擎：2994ccV6DOHC
馬力：220ps/5800rpm
扭力：31.0kgm/4400rpm
傳動：4前速自動波
懸掛：（前）柱式獨立（後）扭力連桿
制動：（前）透氣碟（後）碟式（ABS）
尺碼：4770×1790×1770mm
軸距：2900mm
車重：1720kg
2001年售價：約港幣36萬
現時售價：$339,000起
豐田Estima（即港版Previa），自推出以來一直深受用家歡迎，皆因佢除咗造型突出吸引外，寬敞兼實用多變嘅車廂布局，以及出色嘅性能表現，都係Estima嘅賣點所在。而當屬第2代嘅新款Estima於2000年1月喺日本本土推出後，就經已有水貨車行以迅雷不及掩耳嘅速度將之引入，其中3.0型號嘅八座位版本，當時售價為約36萬；後來代理亦於同年3月，引入新一代Previa嘅七座位及八座位版本，同樣備受追捧㗎。
用家大募集
如果你係車主，你嘅座駕已落地三個月以上，不論對座駕是讚是彈，我哋都願意將你嘅心聲寫成用家報告，與讀者分享。
郵寄：香港將軍澳工業邨西駿盈街八號《蘋果日報》副刊「車天車地」版「用車報告」收
傳真：27420542
電郵：