王賢誌下個月四號至七號喺尖沙嘴美麗華酒店舉行咗個「名人二手衫慈善熱賣take2」，Twins已經捐咗一批二手衫出嚟做善事，而身為Twins師姐嘅容祖兒（Joey），亦都唔執輸，早排攞咗一批佢心愛嘅靚衫出嚟義賣，其中Joey捐嗰一件心愛皮褸，原價要成幾千蚊，但𠵱家二手價只不過係二百九十蚊就有交易，認真超值！
而日前，王賢誌重請咗佢老友鍾麗淇做模特兒，示範Joey呢批靚衫，原來鍾麗淇唔單止出力（做模特兒），而且重出埋錢㖭，事關佢見手頭上唔係太多二手衫捐，所以就趁呢幾日去日本拍旅遊特輯嗰陣，順便買啲靚衫番嚟義賣，真係唔話得。
早排麥包同一班演員王合喜、康華同埋傅珮嘉去咗馬來西亞拍旅遊特輯。麥包話呢次行程初嘗淨係用榴槤做材料嘅飯餸、甜品嘅榴槤宴，令佢畢生難忘之外，佢話最開心嘅係識到王合喜。麥包話佢哋兩個一見如故，好鬼好傾，兩人變成好朋友之餘，王合喜重做埋麥包嘅教練。馮仁昭以為王合喜教佢玩滑水，點知麥包話自己連游水都未識，點教佢玩滑水。所以佢話返香港後會跟阿喜學游水。
張艾嘉噚日喺商台接受《茶煲裏的查篤撐》訪問時話：「我噚晚（即前晚）攞完獎，老公就車咗我返屋企瞓覺，冇慶祝過，今朝起身重好似乜嘢都冇發生過咁。」問佢對於被外間話佢爆冷奪金紫荊最佳女主角獎有冇介意時？佢就話：「冇，不過我唔係冷馬，係老馬先啱。」
何韻詩噚日入電視城為《都市閒情》任嘉賓，何韻詩對於有雜誌指佢兩位好友容祖兒及BoBo（陳文媛）被富豪視為新目標，更公開佢哋嘅肉價，何韻詩就話：「我覺得好無聊，好唔尊重囉，海鮮咩，邊有價㗎，我呢啲款就冇人會考慮。」
肥媽瑪莉亞噚日返有線做節目，佢話揸車返工時差啲撞車，皆因佢喺車度聽到首走音歌嚇親喎，首歌重係台灣搖滾天王伍佰唱嘅，肥媽話：「我揸車去到三號幹線嗰陣，收音機播緊首歌，起初嘅墊底音樂係吹奏緊啲小號，竟然吹到走晒音，嚇到我差啲撞車。」肥媽所說嘅歌曲正是伍佰的新歌《我愛你》。
四人組合VRF噚日喺港台出現，其中成員之一阿Ray一見記者就呻話：「我前日撞咗車呀，我嗰日幫個朋友搬屋，重問咗另一個朋友借部Van仔幫手，點知我唔小心撞咗架車埋牆，成道門凹晒，啱啱先去車行格完價，佢哋話老友價都要收三千八百幾蚊喎。」