中移動（941）宣布末期業績，全年賺280億元人民幣，叫做符合預期，但可惜冇息派，令市場失望，不過管理層都算醒，打開口牌，話明年會派息，相信可以穩定股價。
至於港股後市就要睇吓長實（001）同和黃（013），以及歐洲電訊股德國電訊及Vodafone，因為和黃要撇幾多，都要睇呢兩隻電訊股。
電盈（008）噚日俾高盛調高投資評級後，即反彈3.85%，突破2元水平，收2.025元，成交增加至2.37億元。不過沽空金額竟達4400萬元，大戶係咪真係睇好電盈，實在令人懷疑。
光通信（603）發完7000萬元可換股債券後復牌，股價急升16.4%，成交達2091萬元。
黑客話，有大戶吼準此股股價細，兼且電盈已沽清貨，所以開始為此股熱身，發完可換股債券後估計重有排去，其中一個指標係可換股債券定價為0.055元，與之前收市價毫無折讓。
千禧智慧（724）噚日乾升32.4%。聽Cookie講，此股想賣殼，公司將於3月20日公布業績，據聞有嘢派，所以有人想偷步入市，可惜市場貨疏唔易買賣。
ｅ莉莎話，聯洲國際（048）已經準備就緒，成交開始增加，要向0.25元推進。公司近期頻頻喺0.20元以上大手回購，已橫行咗一段時間，街貨相信已收得七七八八，正等待突破，就算唔大升，都好難跌落去。