中移動（941）上晝收25.45元，晏晝派成績表後，最低24.70元，收24.85元，唔見10仙。中移動成績表相當靚，市場一般估計賺263億元人民幣，彈出280億，增長55%。唯一令人唔happy嘅，係冇息派，股價就咁跌落去。派息唔係咁重要啫，而且中移動話明02年度會考慮派息。
宣布業績後，中移動用最新每股盈利計，PE降到17.5倍。啲基金好快會買番轉頭，見番去年底3字頭個價，唔係發夢。
中移動Call輪吼得過，可以揀9044埋手。呢件交投好旺，74球易手，佔發行量3成幾，8月到期，現價44仙。睇住嚟，9044好快由正股帶動，彈彈跳上5字頭，然後望6。
滙豐（005）升1元，收93.25元。恒生（011）已見上次高位，滙豐距3個月高位98.50元重有唔少水位，睇好。
滙豐Call輪有成22隻，好似好難揀咁。一啲都唔難，搵最大成交嗰件9030落手可也，8月夠鐘，現價1.05元，溢價0.7%，槓桿率8.9倍，好抵買。