祥嫂洪金梅與子女的關係一直都鬧得不愉快。昨日祥嫂往油麻地出席記者會時，被問到有否掛念兒子兆尊，及可知女兒小艾有身孕，祥嫂竟無厘頭指着枱面上的叉燒包及春卷作回應。
黃夏蕙、祥嫂洪金梅、譚炳文和李香琴等，昨日往油麻地敦煌酒樓出席「戲曲慈善籌款晚會」記者會。祥嫂由兩名保安陪同到場，她表示聘用保安已有一段時間，只是記者沒有留意。
昨日見祥嫂容光煥發，問她是否有追求者？她笑說：「追我？香港女人多的是，我回復自由身之後覺得好輕鬆。況且我十七歲開始跟祥哥，好多嘢都會先入為主，咁會將第二個同佢比較。祥哥着起長衫，溫文瀟灑、風度翩翩，着西裝又軒昂，佢仍然喺我腦海入面，等我淡忘咗先再諗啦，緣分一到，要避都避唔到。」
接着問祥嫂有否掛念子女？她竟說：「我淨係掛住叉燒包（指着枱上的叉燒包），不過啲包凍晒啦。」其後再問祥嫂知不知道女兒小艾懷孕，她繼說：「今次我又淨係望到春卷啫，不過又係凍嘅！」
祥嫂即席哼了幾句祥哥的首本名曲《萬惡淫為首》，之後她又問記者：「我啲神態係唔係好似祥哥呀，我話我唔識唱係謙虛，我跟佢幾十年啦，一日學一句都學識啦，不過唱得本事嗰個係祥哥。」
此外，祥嫂在記者會上表現雀躍，她拉攏好友黃夏蕙與其舊情人林蛟合照。當祥嫂與林蛟合照時，夏蕙姨剛巧在旁，祥嫂立即說：「你兩個嗌交呀，快啲影番張相啦。」夏蕙姨還大方讓林蛟輕吻她面頰。
採訪、攝影：李珮洳