小初心諗二三線股因為受鈞濠（115）事件影響，可以唞一唞，點知星期日飲茶撞到靚女經紀，佢話就改名嘅偉栢（491），好似想做嘢。
小初唔係唔信靚女講，只係覺得偉栢話開車，時間經常都唔係幾啱，好似上次有人話偉栢想炒，正係過年冇咩人炒股之時。今次又傳開車，但正好又發生喺鈞濠跌至四腳朝天之時，睇嚟幕後炒家真係要搵人擇吓日子先得。
上周五二三線股兵慌馬亂之時，偉栢重要升近7％，收12.3仙，成交金額增加至成千六萬銀，唔係想炒咁博做咩嘢？
偉栢由52周最低1.7仙，炒到今時今日嘅毫二子，究竟重可以升幾多？重有偉栢由舊年炒到𠵱家，炒嚟炒去都係同一個概念，就係無線互聯網一類嘅電訊概念，但至今尚未有成績畀大家睇。
今個星期五佢公布業績，睇怕舊有嘅玩具業務，業績都唔慌好睇得去邊。