雖則話好多人睇淡樓市，但係周末有咩好得過睇樓兼有免費娛樂呢？所以，即使睇嘅多過買，發展商依然樂於搞活動，利用免費娛樂吸引多啲人嚟，等個場熱鬧啲，我哋行家影張場面相都可以人頭湧湧，登咗出嚟都好睇啲。
不過，次次都係一堆人嘅相，睇都睇到悶，今次就登張活潑啲嘅相過大家睇吓，泓景臺售樓處放咗幾隻電子狗AIBO陪啲小朋友玩（圖），大人睇樓，小朋友玩狗，同樣咁開心。長實話日後泓景臺會所內嘅兒童天地，亦可能會安排電子狗AIBO長駐，不過，該盤未有耐入得伙，到時電子狗都唔係新鮮嘢囉，或者到時要諗吓用第二啲電子寵物吸引小朋友。
另外，最善長搞show嘅信和，周末喺旗下商場亦有時裝表演秀，順便吸引多啲人睇同場附設嘅新盤示範單位，靚女泳衣秀倒也吸引，現場一眾睇樓或者睇肉人士，各有所得。
蘭西