蘇永康（康仔）、陳慧珊（Flora）、汪琳同郭政鴻等，噚日喺無綫電視城古裝街，為今晚首播嘅新劇《騎呢大狀》宣傳，佢哋分組拉人力車比賽，結果由蘇永康同陳慧珊呢組勝出。
現場所見，康仔拉住由Flora坐嘅人力車，跟郭政鴻拉住由汪琳坐嘅另一部人力車鬥快，兩個女仔雖然唔使拉車，但佢哋好緊張咁抓住車邊，人力車加速時重嚇到佢哋大叫，真係「車心」唔易做。
幾經苦戰，終於由康仔同Flora呢一組贏咗，佢哋都好開心。《騎》劇監製徐正康重游說Flora着泳衣宣傳嚟增加收視，但蘇永康話：「佢拍纖體廣告都着長褲，點會着泳衣！好心纖完體着番條短褲啦。」
Flora嘅纖體廣告合約呢個月就會完，佢表示唔再續約。問Flora擔唔擔心收視，佢話：「冇壓力，套劇拍得好咪得，我下次會跳扇舞宣傳，𠵱家等緊屋企人將音樂帶寄返嚟。」
此外，康仔話會唱內地麥當勞嘅廣告歌，酬金重好可觀。問佢係咪五月開演唱會，康仔就話重未落實。
馮仁昭噚日喺沙田馬場見到任葆琳，佢話自己其實好少入馬場，對上嗰次已經係兩年前。今次嚟係因為佢男友胡驊嘅哥哥突然間想入馬場，任葆琳話呢排自己手氣都唔錯，早兩日同朋友玩啤牌都有贏錢，不過入馬場佢就冇諗住贏，只係打算攞一千幾百出嚟玩吓。
鯊魚女陳細潔成日穿梭各大party，一向以性感衣着搶鏡。前晚陳細潔着住一件Versace透視上衣，襯黑色流蘇長褲，都不知幾有性格，謀殺唔少菲林。唔知係咪陳細潔太悉心打扮，到場時個時裝騷已經做完。
江欣燕前晚同老公Jackson去Bluebell時裝展，欣欣同啲記者講，話𠵱家冇事忙，重話會畀兩年時間造人。
欣欣話七月六日係佢同老公結婚一周年，所以佢諗住喺結婚紀念日前，同老公Jackson補影婚紗相。欣欣話今次會搞新意思，諗住着睡衣或泳衣影結婚相留念。
港姐楊思琦重未卸任，已經被無綫重用，新劇拍完一部又部，相信亦因為咁，令到好多諗住入娛樂圈嘅女仔，都想借選美嚟入娛樂圈。馮仁昭聽聞今屆港姐會去沙巴拍外景，諗住以陽光與海灘做主題，有口痕友講笑咁講，話如果今屆港姐去汶萊拍外景，一定重有噱頭喎！
嚟自內地嘅亞視新人李華噚日出席「第八屆十大電視廣告頒獎典禮」，問到佢未來動向，佢話：「嚟緊會同陳法蓉合作拍亞視新劇《五十年不變》（暫名），我哋喺劇裏面會爭男朋友，呢個係一個好好嘅發揮機會，我等咗好耐，所以之前有機會參選中國小姐我都放棄。」