美國啲死黨報料，話「加拿大飛人」卡達啱啱推出嘅新電視廣告鬼死咁正，卡達着住對「一剔牌」嘅新波鞋，喺紐約市嘅街頭籃球勝地RuckerPark瘋狂入樽，睇到我班friend嗰嗰都拍案叫絕。不過好衰唔衰卡達呢對新鞋同嗰廣告出街嗰日，撞到正速龍連輸十三場，加上啲鬼佬相信十三不祥，呢次真喺大吉利是囉！
「一剔牌」呢排都可算喺禍不單行，早排「波神」佐敦啱啱推出咗對新鞋冇幾耐就受傷，搞到要養傷四至五個禮拜；旗下第二號王牌卡達推出新鞋又撞正佢隊波輸到阿媽都唔認得，真喺生不逢時。
其實我求大俠亦都喺呢兩個「新舊飛人」嘅超級擁躉，希望佢哋早日再喺球場上大發神威，一飽我哋呢班fans嘅眼福。
曼聯波士費格遜認真照顧同鄉，佢見蘇格蘭鄉里禾達史密夫冇嘢撈，就諗住叫對方去紅魔鬼幫手做佢嘅助教，但我求大俠一聽就覺得老費擺明喺度玩嘢，事關禾達史密夫假假哋都喺大球會（格拉斯哥流浪同埋愛華頓）教過波，兼且成五十幾歲人，有乜理由要屈就做老費條靚呀！
有位仁兄重注五萬五千美金（約四十二萬四千港元），買西班牙成為今屆世界盃冠軍，不過我求大俠覺得咁同掉啲錢落鹹水海冇乜分別，我唔敢睇小
錫菲聯喺上禮拜六對西布朗場波，有三個球員被趕出場兼兩個受傷，得番六個人踢，球證就喺西布朗贏梗三比○時腰斬。英足總會喺周四決定判西布朗贏三比○抑或重賽，但西布朗就話唔重賽，直指係錫菲聯特登咁做。雖則錫菲聯係冇體育精神，但呢招又真係幾絕喎！
唔知係咪停賽關係，李鐵練波時特別落力保持狀態，點知練射門時大力得滯，省中一名在場女球迷。你估「寸王」李鐵有咩反應？佢就一改以往至Cool形象，走上前向女球迷道歉同連番慰問。我求大俠就唔知個女球迷靚唔靚，但「鐵漢」總算有番啲男士風度，況且咁多記者同球迷在場，詐唔知算數又有排俾人講㗎。
拉素今季戰績差，球迷好躁，球員就更當殃。日前甸奴巴治奧同卡斯度文響酒店遇襲，擺明係球迷所為。我求大俠認為球迷要出氣應該搵教練沙哲朗尼或者表現差嘅尼斯達，無理由揀兩件後備，唔通點錯相？
求驗客手記逢星期一至五刊出
E-mail: