新菜牌：
春夏開胃菜式新登場

三月天，氣溫開始慢慢上升，天氣變得又濕又悶，無胃口但又唔想錯過各款美食的話，今日就要開始揀飲擇食，少油、清淡、開胃一律唔好放過，邊度有得食？又一城溜冰場旁邊的EXP/2，已率先推出一系列有齊以上元素的春夏開胃菜式，伴以溜冰場的涼快氣氛，一於將悶熱踢走!

記者：黃婉冰
攝影：周旭文
ImageGirl：Celina

燒豬頸肉紙米卷$22
由薄如紙的米紙，包着用香茅、醋、泰式辣椒醬醃過再燒的豬頸肉，另加入芽菜、炸乾葱將爽脆口感提升，外層的米紙無味，食時記得蘸上由大廚自創的醬汁，麻醬、鎮江醋、辣椒醬、黑椒、香茅，中、西、泰一齊混「醬」，令紙米卷清中帶惹味！

Celina試味： 豬頸肉夠薄又唔肥，唔同傳統嗰啲咁又肥又厚，外層米紙煙韌，麻醬汁好香，令紙米卷食落更加惹味。

西柚鮮蝦蕎麥麵$49
大廚特以清新開胃材料如西柚、芒果、蝦球配日式蕎麥麵，叫你大開胃口，用日本豉油、意大利提子醋及糖做冷麵汁，酸酸甜甜，與清甜紅肉西柚、芒果一拍即合，蕎麥麵不經油炒，不肥不膩，推出兩個多星期已成為不少女士的新寵。

試味報告： 蝦球爽甜惹味，為清寡的蕎麥麵加以點綴，麵汁酸甜開胃，味道跟普通意大利醋截然不同，蕎麥麵軟硬適中，口感不錯。

薑果汁(上)　泰汁(下)各$20
薑有助祛濕，最適合現在濕漉漉的天氣，鮮榨薑汁溝鮮蘋果汁、提子汁，生果香甜味正好中和薑的辣味，三種味配合得天衣無縫。泰汁較簡單，只得青蘋果汁和泰國香茅，以香茅製果汁都算罕有。

試味報告： 薑果汁無預期中的辣，淡淡薑味夾雜果汁的酸甜，味道清新，泰汁中的蘋果汁味道較突出，香茅味較輕，兩者分量校得剛剛好。

香草蟹肉薄餅$62
睇真啲，薄餅上面是用人手拆的新鮮蟹肉，配以意大利番荽、貴價蟹子，材料簡單才能食出鮮味。薄餅由批底到醬汁都由總廚關師傅自己一手炮製，薄餅汁以鮮番茄熬製，鮮茄味香，再分別撒上以煙韌為主的Mozzarella芝士、味濃的Parmesan芝士，口感、香味並重，即叫即焗，熱辣奉上。

試味報告： 薄餅有厚薄兩種選擇，厚批外脆內鬆軟，鮮茄汁、芝士味道校得剛好，令蟹肉鮮味能夠突圍而出。

蒜苗牛肉炒拉麵$49 食客推介
拉麵並非來自日本，是師傅自己用麵粉、油、水自製，中式拉麵用滾水淥一淥，加入蒜苗(即韭菜花)、韭黃同炒，菜香被拉麵吸收，煙韌麵條配腍滑肥牛肉，口感配搭得宜，再淋上蠔油汁，傳統中式口味，鑊氣十足。

Irene試味： 拉麵煙韌，口感好好，味道唔會太淡太濃，啱啱好，牛肉腍滑味鮮，拉麵炒得唔肥膩，好好味，而且價錢都唔貴。

香辣燒大蝦飯$52 記者推介
無可否認大蝦是主角，但墊在下面的飯亦不遜色，將意大利米加入芹菜粒、意大利番荽、乾葱、蒜頭、甘笋先炒香再煮，令配料香味滲入飯粒，飯香四溢。大蝦、鮮蘑菇、茄子、番茄用鐵籤串起烤熟，用新鮮辣椒、辣椒乾、茄汁、鎮江醋做四川汁，香辣味濃。

試味報告： 飯粒入口不像傳統意大利飯般半生熟，軟硬適中，飯粒不會過於黏，口感非常好。大蝦沾滿四川汁，辣度溫和香濃，仍可食到鮮蝦味。

店名：EXP/2
電話：22658298
地址：九龍塘達之路80號又一城UG23號舖
座位：180個
營業時間：上午11時至晚上11時
付款方法：現金及信用卡(Visa,Master,AE,Diners)