美國經濟數據繼續向好，由於商業存貨在去年底已跌到低水平，為迎接經濟復甦，企業定單開始回升，2月份的工業生產指數上升0.4%，設備使用率也升到74.8%。經濟雖見底回升，但未見有通脹壓力，預期低息環境在上半年仍可維持，到第3季才會有加息壓力。
恒指在升破雙底的頸線（11108）阻力後，繼續在高位進行後抽整固，恒指最高曾見11381，最低回到11150，在10日線水平（11143）獲得支持回升，後抽整固有可能已完成。不過，若有大戶為了要「食」盈富（2800）批貨，而不惜刻意造淡，且又能得償所願，則唔排除恒指會跌穿11000大關，再試低位支持。目前50日線在10957水平，會係跌穿11000大關後的第1個支持位，但即使此位失守，再跌幅度亦有限，在大戶「食」咗盈富批貨後，大市升勢就會再現。所以，即使大市暫時唔升得，或者破位而落，都唔會有大礙，忍耐多一頭半個月，好好部署把握下一個升浪吧。
大陸資金上周有在國企上作小試牛刀式出擊，但動態遠不及外資基金般積極，最明顯係外資大行又再露面，大手吸納上海石化（338），佢哋已經買咗成兩個月，平均價應在1.1元水平，以中長線為出發點，佢哋唔賺一個開，唔會放手。
上海石化月底前會宣布業績，盈利倒退已在預期之內，上海石化本身亦已發出盈警，話會倒退約50%。不過，基金現時沾手上海石化，主要係以前景為出發點，預期今年下半年石化業會由谷底回升，而盈利亦會好轉。當然，中國重整石化業，亦係其中一個利好因素。
上海石化目前正形成雙底上升形態，上周五高收，後抽整固或已完成，若破1.21元阻力，短線量度升幅可見1.35元。