近年RPG嘅潮流都趨向大型線上多人對戰（網上RPG），但呢類Game需要極長時間儲Level同裝備，再加上成日要等齊隊友先可以出戰，真係唔係太適合工作繁重的玩家。最近單人RPG有隻叫《TheElderScrollsIII:Morrowind》將會推出，遊戲自由度直可媲美網上RPG，因為故事嘅推展，會依從你每個行動同說話而改變，而且你想做英雄或狗熊都悉隨尊便，可算係現時最Free的單人RPG。
文：方樂鵬
正如傳統的RPG，玩家在開始歷險旅程之前，必須先設計好角色的外貌、職業和能力值，不過嫌麻煩嘅話，遊戲亦有一些預設角色畀你揀，例如以狠辣見稱嘅戰士Redguard、身手敏捷兼具備極高禦寒能力的盜賊Khajiits、擁有強大力量的魔法師Bretons等等。
留意在選擇種族時，玩家記緊要細心觀察陣營的資料，了解清楚遊戲世界內邊啲係自己友，邊啲係敵人。
另外，非玩家角色（NPC）對你的態度，除了陣營之外亦會從其他地方計算，例如口才技能高的玩家，同NPC自然好傾啲，加埋一身頂級裝備，對方更會懾於你嘅威勢而退讓三分。
《Morrowind》的故事發生於名為Tamriel的奇幻世界，由玩家扮演主角將以囚犯的身分登場，被放逐到Vvardenfell島上擔當苦役。由這一刻開始，遊戲將以完全動態化的模式運作，玩家可完成一連串初級任務（這亦可說是新手入門指引），光明正大重獲自由離開；同樣你亦可以諗計偷走，神不知鬼不覺咁逃離荒島。至於日後的故事情節，同樣完全根據玩家選擇的路向發展，無論你想做英雄抑或做賊都冇問題，總之想點玩完全睇你。
戰鬥系統足以影響成套RPG嘅樂趣，《Morrowind》在這方面同樣經過精心設計，而最值得讚賞嘅首推攻擊指令。基本上每款武器均有最少三種招式，玩家只要將滑鼠游標或搖桿推往特定方向按鍵，便可立即使出指定的招數，令戰鬥的節奏更簡單明快。
咁都未算，遊戲中敵人的損害程度，將根據你所指定攻擊的身體部位來計算。換句話講，玩家只要將攻擊範圍鎖定敵人的要害，殺傷力便會大大增強，雖然未知成功率有幾高，但最起碼夠過癮，比起不斷盲目攻擊更多變化。
預定發售日期：2002年4月
售價：約$390