美股經濟數據理想，杜指上周五升90點，收10607。杜指上周反覆回升35點，走勢仍較港股強。不過，過去兩個星期，杜指主要受制於去年7月頂部10679阻力，未升破呢個阻力之前，須慎防杜指隨時出現較大回吐。
中移動（941）今日公布業績，上周五則出現回吐，反映部分投資者喺業績公布前沽貨，鎖定利潤。不過技術上，中移動仍守10日線（現處24.60元）之上，加上上周五沽壓唔算特別大，走勢唔算好惡劣，除非業績較市場預期差，短期50日線23.80元應有一定支持，但趙飛雲就冇乜興趣買。
如果中移動冇事，禮拜四長實（001）及和黃（013）公布埋業績後，港股去向將較為清楚。不過趙飛雲較為擔心美股可能有調整而影響港股，呢個禮拜傾向沽貨多過買貨。
早輪炒過嘅中航興業（1110），2月19日升至1.64元高位後反覆調整，上周收1.51元，已跌近1.50元重要支持位，如果失守，跌勢將會轉急，趙飛雲打算喺50日線1.42元附近撈番佢揸中線。