中移動（941）、電盈（008）、長實（001）、和黃（013）等，今個禮拜派全年成績表。中移動同電盈業績會幾靚吓，長實同和黃則大倒退，不過都應該喺市場預料嘅範圍內。4公司股價嘅反應，估計係中性至偏好。美股生性，對港股則有利好刺激。
保守嘅股民，可以等大藍籌派成績表後，再決定點樣炒佢哋啲窩輪。
中信泰富（267）上禮拜四份成績表，市場唔收貨，禮拜五股價由16.45元散落16.05元，唔見40仙，令兩隻熱門Call輪跟住碌落去。9160收20.6仙，冇咗9.3%；9037收23仙，唔見8%。
中信去年盈利大倒退36%，但02年度有望回升25%，咪太悲觀，股價隨時反彈，中信Call輪值得趁低買入博反彈，9160仍係主角。
新世界（017）上禮拜五企定喺6.60元，Call輪9172則跌7.4%，收15仙。
新世界今個禮拜五派半年成績表，有大量非經常盈利入帳，趁低買定9172有着數，隻輪10月到期，溢價4.6%，槓桿率4.4倍，唔錯。