Twins昨日擔任黃大仙龍翔中心的開幕嘉賓，二人雖然抱病在身，但仍落力表演，還即時表演打鼓助興，令全場fans大為瘋狂。而蔡卓妍今日便會在醫院進行鼻骨矯正手術，她表示毫不害怕，還輕鬆的說只是小手術。
二人組合Twins昨日為黃大仙新開幕的龍翔中心擔任開幕嘉賓，Twins所到的地方均吸引過千人圍觀，由於昨日是商場的開幕禮，所以有醒獅表演，而Twins亦即場助興，表演打鼓及唱歌。
蔡卓妍（Charlene）與鍾欣桐（Gillian）昨日都抱病在身，Charlene發燒未退，而Gillian右手則不慎扭傷，但二人都相當專業，即時學習打鼓，Gillian笑謂：「打鼓好搞笑，啲動作好大，不過我整親隻手，唔可以太大動作。」而Charlene則笑說：「原來打鼓啲動作咁騎呢嘅，學極都唔係好識，哈哈！」
至於Charlene在演出後，昨晚更提早入醫院準備在今天做鼻骨矯正手術，她說：「其實呢個只係小手術，咁我媽咪都會陪我入院，你知啦！一個人喺醫院好驚㗎嘛！我重可以趁呢幾日叫啲好耐冇見嘅朋友來探我㖭。」原以為Gillian亦可趁這空檔休息，但Gillian卻說：「我都冇得休息㗎，我趁呢幾日學吓唱歌同埋去學車。」
此外，前晚Twins亦有出席在會展舉行的時裝表演，有雜誌指兩人身家已有五百萬，她們齊聲否認，更表示現時市道不景，有工開已經好滿足，至於傳兩人不和，甚少一齊去買衫，唱片公司工作人員即時擋駕說因怕兩人一齊出現被市民圍住；至於有傳謝霆鋒、陳奕迅和容祖兒不滿唱片公司對Twins兩人特別照顧，Charlene說：「我哋點可以同啲阿姐阿哥比吖，我哋係新人，為咗打好基礎，公司幫得到我哋一定幫嘅！」
採訪：胡比
攝影：黃文成