謝霆鋒花了九個月時間裝修、投資過五百萬元的私人Band房，日前終於落成。前日霆鋒在Band房內接受訪問時，表示Band房每一件大小物品，皆是他用血和汗賺取，更透露現時英皇抽佣是天文數字。昨日霆鋒又自爆曾在荷蘭抽大麻。
年年僅二十一歲的謝霆鋒，入行短短四年，已擁有兩輛法拉利、兩間約值六百三十五萬及七百八十萬元的豪宅，甚至總投資超過五百萬港元的私人Band房，這些都是他努力的結果。雖然在此期間，是非、批評和緋聞不斷纏身，但霆鋒仍覺得自己十分好彩。
昨日謝霆鋒在黃埔宣傳電影《戀愛行星》，被問到有藝人服用軟性毒品增加創作靈感時，他認真地說：「Sorry呀，你哋可以問埋我啲朋友，謝霆鋒有冇攞過啲大麻出嚟。」
不過，霆鋒卻承認曾在荷蘭阿姆斯特丹抽大麻，他說：「我去阿姆斯特丹旅行就試過食（大麻），嗰啲係合法國產，有醫生證明可以醫嚴重頭痛，係藥嚟嘅，有護膚品都有用，我只係見識，我都唔鍾意嗰種味，我唔係推廣，我最終強調我冇（再食）。」
早前有報道指霆鋒返加拿大戒毒，他說：「本雜誌最後總結完之後話唔係（戒毒）喎，咁你講晒啦，你搵嗰個人（記者）嚟講吖笨！成日聽聞完又嚟問，你搵到人指證我至算吖笨！你叫嗰個人夠膽寫呢篇嘢，就用自己嘅真名，我唔用律師告佢我唔姓謝，我夠據聞佢老竇強姦佢個女咯。」
其實荷蘭早在七十年代，已將吸食及銷售大麻合法化，並設立合法的大麻咖啡店出售含有大麻成分的香煙。現時荷蘭全國約有二千間大麻咖啡店，而首都阿姆斯特丹更是其門如市。
而前日霆鋒在其中環雲咸街新落成的私人Band房接受訪問時，看着自己足足花了九個月精心設計的「私竇」，他一臉滿足地說：「我覺得自己好好彩，但唔可以抹殺我呢啲嘢（Band房）嘅背後，係用咗我幾多血、幾多傷痕去換番嚟。呢間Band房成五百幾萬嘅投資，每一件物件，都係我背脊骨嘅傷，同埋對腳縫幾多針去換取。」
說罷，霆鋒捲起褲腳展示他過往的「戰績」，單是膝蓋至腳眼位置，已有六、七道疤痕之多。
霆鋒說：「我第一部戲《新古惑仔之少年激鬥篇》有一場地盤劈友戲，嗰日我腳眼位置唔小心俾嘢𠝹開咗，見到骨兼且成鞋血，我唔想第一次拍戲就阻住進度，於是攞個垃圾袋包住隻腳，再劈多三個鐘，之後先至入醫院，隔籬爆晒缸嗰啲都要行埋一邊呀！
「醫生話我過咗六個鐘頭先至走嚟縫針，啲破傷風菌可能走勻全身，會死人，結果要我簽張生死狀先至同我做手術。」
謝霆鋒：謝 記者：記
記： 你簽咗十年賣身契畀英皇，年期咁長後唔後悔？
謝： 冇話後唔後悔嘅，其實我初時簽四年之嘛，後來我同公司嗌交，偷走返加拿大，坐食山崩，咪求番公司畀我返嚟囉，結果返嚟嘅條件就係加多六年合約，由四年變十年，跟住再變嘅就係抽佣嗰啲嘢，乜嘢都變咗一個天文數字。
記： 當年點解同公司嗌交？點解又要求公司畀你返去？
謝： 我唔想做一啲我覺得唔係我做嘅嘢，但環境經濟迫成，我返加拿大之後坐食山崩，我要諗屋企經濟，爹哋同媽咪又離咗婚，我要諗個妹（謝婷婷），要諗嫲嫲，諗吓我自己，我係咪留喺加拿大就得呢？
記： 公司抽佣唔係一開始抽幾多就幾多㗎咩？
謝： 初頭抽好少㗎咋，但𠵱家──唔使講啦！不過，相對嚟講，我亦得到公司嘅尊重，可以畀我做自己鍾意做嘅嘢。
採訪：戴彩煥、何永寧
攝影：仇志德