名模Rosemary一向順從母親Julie，她前晚得知男友Gordan向她發表愛的宣言後，要等母親離開身邊才敢回應。不過當她聽到母親指摘男友後，罕有地在公開場合駁嘴。
名模Rosemary前晚偕母親Julie到銅鑼灣吉列島香港遊艇會，出席「TheMacallan1951LaunchParty」，周啟邦夫婦及陳敏之等都有出席。
日前Rosemary男友Gordan公開發表愛的宣言，Rosemary聽到記者複述Gordan的說話後，先警覺地望一望旁邊的母親，然後以英文說：「我唔知，我寧願佢同我講而唔係同傳媒講。」後來，Rosemary見母親行開，便暢所欲言地說：「其實呢啲係私人嘢，我哋有聯絡，佢咁講我覺得好touching，佢係個niceguy。」不過Rosemary一見母親折返，又隨即收口。
問Julie對Gordan的宣言有何看法，她說：「我覺得呢啲問題係私人事，我唔鍾意佢開口講，咁高調，（拍拖）唔會長㗎，自己攞麻煩。」她又教訓Rosemary，她說：「呢句說話唔係淨係話你，你要同佢（指Gordan）講呀。」Rosemary聞言後，即時駁嘴說：「傳媒問你嘢你都唔係全部唔答啦，佢（指Gordan）都唔係特登講嘢，佢只係答問題。」
Julie此時顯得有點憤怒，她說：「總之私人嘢唔使公開。」而身為女兒的Rosemary見狀，立即低聲說：「係囉，我會同佢講，我都贊成唔係有乜都要同傳媒講。」
其後Julie對記者說：「我唔係反對佢哋，但都唔係咁快成日講sunshine、sweetheart嘛，有乜意思啫？」兩母女繼而重展歡顏拍照。
另外，前晚大會介紹一隻1951年份的純麥芽威士忌，全球只得六百三十二瓶，香港配售十八瓶，每瓶售價二萬二千元。