談音樂、談工作，霆鋒可以滔滔不絕，但一提到感情，他卻有所保留。
記： 你之前幾位女朋友年紀都比你大，你係咪特別鍾意年長啲嘅女性？
謝： 唔係呀，年紀冇關係㗎，我入行嗰陣已經係最細嘅一個，又何來搵個比我細嘅呢？連Twins嘅鍾欣桐都比我大啦。
記： 你咁多緋聞，王菲唔擔心咩？
謝： 有啲嘢係互相信任嘅。
記： 點維繫你同女朋友嘅感情？
謝： 好難講，好難形容。
記： 兩個人相處有冇拗撬？
謝： 有邊個冇拗撬吖？我同爹哋、媽咪同普通朋友都有拗撬啦，咪一人讓一步囉。
記： 你自問係咪一個細心體貼嘅人？
謝： 細心嘅時候會好細心嘅。
記： 點細心法？
謝： 講咗好「糯」（意指瘀）㗎。
記： 你自問係咪一個好好嘅男朋友？
謝： 我唔係一個好男朋友，因為我太多嘢顧，又有好多嗜好，我對屋企有責任，我有爹哋、媽咪，我有細妹，我有嫲嫲；我有Band房，我有六十幾支結他；我有幾部車要去錫，要去顧；我有咁多朋友；我有我嘅音樂。一日得二十四小時，又何來咁多時間陪女朋友呢？
冇錯，有一次我係專登返嚟同女朋友過生日，我返嚟一日，第二朝就即刻上機，OK，咁又如何呢？係咪送咗小小禮物就代表啲乜嘢呢？係咪就可以維持到幾年？
記： 你有冇計劃過將來？
謝： 每個人都有夢想，但今日唔知聽日事，我愈嚟愈覺得，眼前就係最開心。？
謝： 有人話我彈結他唔好，但我從來冇話過我彈結他好喎，呢個世界，有冇一個全能音樂人攞「最受歡迎男歌手」之餘，重係一個好男朋友，好乖嘅仔，好好嘅朋友？我就唔信會有，神都顧唔到咁多嘢，更何況係人！
儘管霆鋒口口聲聲指自己不是一個好男朋友，不是一個十全十美的人，他卻自言對感情絕對專一，從未試過一腳踏兩船。
霆鋒說：「我爹哋以前好多緋聞，同我條命一樣，但我媽咪話我爹哋其實係一個好專一嘅人，我覺得我非常似佢。坦白講，我從來冇試過同一時間有兩個女朋友。」
就正如近日他與張柏芝的緋聞一樣。霆鋒表示在他心目中，柏芝只是一個他疼錫的妹妹，雖然實際上柏芝年紀比他還大。
霆鋒說：「我好容易會疼錫一個人，當係妹妹咁看待，大家鍾意點寫就點寫，冇所謂。」
而霆鋒的父親謝賢雖然在娛樂圈身經百戰，但卻未有特別教兒子如何面對這個是非圈，霆鋒說：「佢淨係送過兩隻字畀我，就係『執生』！」