近期愈來愈多韓國電影、韓劇喺香港播映，呢陣韓風不但捲入了娛樂界，連超市內，都可以找到許多來自韓國的食品，究竟邊一個特別，邊一個夠特色？不如等小記為你介紹一下，當中有韓國名產人參製品，韓國人必食小吃泡菜食品，及一些得意有趣零食。
記者：葉少萍
攝影：陳偉強
人參系列
講到韓國食品，又點少得用人參製的產品？人參糖咁大家食得多，呢款用人參作餡，糯米作皮，表層再加一層朱古力，未入口先聞到陣陣朱古力味，咬落朱古力夠香甜，糯米皮夠煙韌，而中間人參餡的人參味足夠，食落感覺都幾得意。
$13.8/盒（155克/5個）
銷售點：尖沙嘴新世界百貨needs
除了有食得之外，重有呢款一沖即飲得的人參蜜糖茶，成分有25%人參，其餘成分是蜜糖、葡萄糖、果糖等等，喺韓國製成再入口，重冇加任何防腐劑、人造色素等等，只需用150-180cc水，加2-3茶匙人參蜜糖攪勻即可飲用，入口有陣陣人參同蜜糖味，飲落甜甜哋甘甘哋，夠晒潤喉，凍飲熱飲都可以，但開封後要放入雪櫃保存。
$68/樽(580克)
銷售點：金鐘太古廣場great
泡菜系列
韓國製的泡菜差不多每個超市都有得賣，邊隻好味好食？不如試吓呢款喺韓國製好先入口的樽裝泡菜，喺韓國及日本都好受歡迎，多數用來煮食用，所以樽上有教埋點煮，好似想煮泡菜煲，就先要炒熟豬肉，再加入辣味醬汁，少許水、豆腐、泡菜等，分量隨個人喜好增減。
37.9/樽(400克)
銷售點：金鐘太古廣場great
想好快有得食充滿韓國風味的麫，咁就要試吓呢隻喺韓國製好，再運到港的泡菜味杯麫，只需加入100度C熱水焗約4-5分鐘，就可以食到一碗充滿韓國地道風味的泡菜味麫。未食先聞到一陣泡菜辣味，入口辣辣哋，咬落的麫煙煙韌韌，食法又方便，你又點可以唔試。
$13/杯(110克)
銷售點：city'super
唔想買已製好的泡菜，自己製又驚要左搞右搞，咁就要買呢款用來醃製泡菜的泡菜粉，包裝上重教埋點樣醃製。只要將紹菜洗淨切片煮熟，加入適量泡菜粉、紅辣椒粉、紅辣椒碎、少許水攪勻醃製約2-3小時即可，味道唔錯㗎！辣度更可隨個人喜愛而增減泡菜粉的分量。
$15/包(360克)
銷售點：city'super
特別推介
韓國食品小朋友一樣有選擇，好似呢幾款朱古力咁，不但入口朱古力味又香又甜，有外形好似石頭一樣夠得意，又有成粒好似古代恐龍蛋的，當然唔可以少了朱古力好配搭花生朱古力，外表吸引之餘又好味道，小朋友同大人都適合食。
$3.5/包(40克)
銷售點：尖沙嘴新世界百貨needs
有得食又點可少得飲品，韓國出產的飲品一樣有不同配搭，好似呢款由青提子配椰果的青提椰果樂，未入口就聞到青提酸味，入口又酸又甜，飲落重可以食到有一粒粒椰果，雪凍飲就最好味。
$5.5/罐(238毫升)
銷售點：尖沙嘴新世界百貨needs
有特別配搭外，重有符合健康要求的，好似呢款健康米漿，入口有陣陣米的香味，飲落又香又滑，有些似飲豆漿咁，不過就冇咁甜，飲落感覺較清香嫩滑，佢係將營養豐富的米磨成漿而製成，飲得多用豆造的豆漿，不如試吓用米造的米漿。
$7.5/支(180毫升)
銷售點：尖沙嘴新世界百貨needs