李純恩寫《吃在××》，寫到出癮，一本《吃在上海》，暢銷一時，又唔怪得博益出版社捉着佢唔放，要佢繼續寫落去。李純恩近來頻頻去澳門，約埋成班老友記在星期五過去住一晚，食番一餐勁嘅，可惜左丁山俗務纏身，冇法子行得開，只得口中對阿恩講鎖你，心中實在遺憾到極，因為有佢安排，平時要排隊好耐嘅著名食府，我哋都可以施施然入座也。
澳門旅遊興旺，的確有其理由，唔去賭嘅話，淨係小城風光，歐洲遺貌，殘陽小巷食靚嘢，已經足夠吸引力，發咗三個新賭牌，預料三年後到澳門，賭場之外就係高爾夫球場、兒童遊樂場，一家人各適其適，長假期之時，香港人在本港消費？比較難咯。
何厚鏵特首發賭牌，已夠諗頭（即創意也），點知佢重識得親自在幕後發功、斡旋，搞掂咗葡萄牙國家隊在打世界盃前，先到澳門練幾日波，世界盃開鑼前六日，喺五月二十五號會同中國隊打一場熱身賽，嘩！球迷到時重唔走過去撲飛睇費高大戰李鐵？氹仔球場想唔爆到瀉都幾難。呢場波會轉播到全世界，對澳門嘅宣傳價值，大到無倫，澳門旅遊局一定歡喜到震。
睇吓人，想吓自己，董特首係利物浦球迷，點解想唔到搵英格蘭隊嚟香港練波，等我哋喺大球場睇范志毅孫繼海大戰碧咸奧雲呢？澳門嗰位鏵哥睇落真係醒目啲。