黎淑賢、梁漢文同李燦森等，噚日喺樂富中心出席「冰河世紀奇妙旅程」揭幕禮，《冰河世紀》呢套電腦動畫，亦將會喺月底上映，而梁漢文同李燦森都有份為《冰河世紀》配音。
喺噚日嘅揭幕禮入面，黎淑賢、吳岱融同詹秉熙都有帶埋佢哋嘅囝囝囡囡到場，可謂二十四孝父母，其中以黎淑賢三歲嘅囝囝盧俊彥最活躍，佢不停咁走嚟走去，一陣又跑去玩滑梯，搞到媽咪都要跟住佢四圍跑，睇見都辛苦。
至於梁漢文就話，佢上幾個月都要開工，所以好希望可以休息一吓，佢重諗住計劃緊去泰國曬太陽，不過就冇膽量裸泳，因為佢怕萬一俾人影到全相，到時都唔知點算好。
徐子淇噚日喺英國返嚟香港，佢一見到記者就問：「我有冇唔同，有冇瘦到？」原來佢喺嗰邊積極減肥，兩個多月就足足減咗十三磅。
徐子淇噚日重帶咗隻四呎長嘅白老虎公仔返嚟，佢話：「隻公仔係我玩遊戲得到嘅，用咗八英鎊（約八十港元）咋。」
馮仁昭前晚喺太古廣場連卡佛fashionshow，撞到稀客鄧梓峰，見佢一個人喺度睇show，自得其樂。原來鄧梓峰係連卡佛嘅捧場客，佢話：「今日有時間行街shopping，頭先喺連卡佛買咗六件恤衫，每季大概用五、六萬蚊買衫，我都算係貪靚一族嚟㗎！」
有個未婚媽媽女星，好鍾意電話騷擾其他人，而佢騷擾嘅對象，統統都係情敵。尤其佢同風流男星拍拖，由於呢位男星有唔少女友，未婚媽媽一知有情敵出現，就會半夜三更打電話騷擾對方，佢最興嘈醒人之後就粒聲唔出，重要唔係玩幾晚就收手，而係成個月，認真誇張。
電台沙聲女主持真係身在福中不知福，個黃皮白心嘅男友唔單止幫佢交租，為咗佢哋嘅未來，正職之餘夜晚重做埋兼職。可惜呢個沙聲女主持，唔單止無因為咁而感動，重同舊男友舊情復熾，現任男友不知幾傷心，但衰在自己放唔低，惟有借工作消愁，繼續日夜咁做搏命搵錢，麻醉自己。
有個電視台上位姐仔，出晒名冧仔有一手，佢冧得人嘅原因，除咗識得說話陰聲細氣夠溫柔之外，最重要係唔介意送個goodbyekiss畀裙下之臣，搞到啲仔鬼咁冧。
好似之前呢位姐仔同個歌星小生拍劇嗰陣，兩個戲假情真，喺戲裏談情都未夠喉，重要晚晚收工後嚟個goodbyekiss先走，不過佢哋最終都無正式拍拖，點解？因為就算呢位姐仔無論落足幾多姣功，都敵唔過對方嗰位女友。
《智在必得》參賽者譚偉文早前被取消資格，噚日佢喺電視城門外示威，最後遭電視城保安部報警驅趕，譚偉文話：「我今次係要取回公道，我當日係冇作弊嘅。」而無綫外事部助理總監曾醒明就話：「我哋法律部已經回覆佢，我哋做法係合情合理，而佢亦有權表達自己意見。」