羅兆輝大爆富豪明星性史，搞到城中名人紛紛同事件中主角有意無意間「保持距離」，其中賭王何鴻燊亦涉及其中，唔知係唔係因為咁，搞到一向交遊廣闊嘅董太，噚日亦罕有地唔肯同賭王合照！
話說賭王噚日出席「女童軍同步創明天」活動，特首夫人董趙洪娉都在場，重俾記者包圍，後嚟賭王一出現，班記者即刻飛撲埋賭王度。
其間可能有人心急過頭，推撞到董太，令董太唔多高興，當記者請佢兩位合照時，賭王笑笑口移步諗住影靚相，點知董太係都唔郁，就算不斷有人要求兩人合照，董太始終都冇表示，最後主辦單位以趕開場為理由，安排兩人入場。
但係賭王都算有心，個活動完咗，嘉賓紛紛離開之際，佢老人家三步夾兩步走埋去準備上車嘅董太身邊，同佢握手道別，今次董太有回應啦！八方估計董太都係嬲記者撞到佢啫，唔關賭王事嘅。
E-mail：