唔知係唔係朱總理指出香港有特殊優勢嘅關係，近排突然多咗好多間公司被華資企業睇中，希望可以借殼喺香港上市，早前曾經被傳聞會賣盤嘅萬信集團（555），上個禮拜四停牌後就更加成為賣殼傳聞的主角，另一位主角就係有台資背景嘅鼎康御泰證券。雖然雙方都唔肯出嚟解畫，不過呢間台資行過去一年喺本港金融市場動作多多，早前有人見到兩行嘅老闆頻頻見面，一睇就知「拉埋天窗」係遲早嘅事。
知情人話今次收購萬信，除咗係港台資金外，重會力邀國內猛料中資證券行加盟，話要成為首批打入國內A股市場嘅華資證券行，喺引入中資股東之後，新形勢係造成「三足鼎立」嘅局面。由於有中國概念嘅股票近期非常受落，加埋國內如果真係有筆資金可以透過合格國內機構投資者（QDII）嘅方法流入港股，呢鋪真係想窮都難咯。
因此有人話要跟實呢隻股票，重話隻股復牌後分分鐘可以升到去5毫樓上㖭。
2000年尾大手供股嘅意科控股（943）喺半年全無動作下，上個星期四無端端由0.84元急跌到落去0.43元，足足跌咗四成八有多，雖然公司即刻作出不知情嘅聲明，不過唔單止對隻股嘅跌勢無幫助，星期五重跌多兩成，市場即刻傳聞四起，有人話有人要斬倉所以隻股仔先跌得咁勁，亦有人傳隻股有隻可換股債券到期，大戶要壓價攞着數。不過據知情人所講，意科只係得一個倉押喺間台資行度，而隻股喺供股後無乜動作，所以手頭現金非常充足，據聞有人想要呢隻股個殼，就用早前對付惠陽控股（231）嘅招數，希望迫爆個倉，然後喺條街度收貨。如果傳聞係真嘅話，呢隻股分分鐘重有得跌。