衞星導航系統喺外國不少地區早已盛行，但喺香港卻未有一套系統，能夠如外國般成功。最近一間名為ComeMon嘅電腦公司，就開發咗一套名為CarPC嘅多功能汽車電腦，佢除具備有衞星導航功能外，更可將車廂化身成流動辦公室，又或者係流動影院都得㗎。有興趣嘅朋友，就唔好錯過今日呢個介紹喇。
記者、攝影：黃凱穎
呢套CarPC嘅衞星導航系統，其實係透過人造衞星傳送資料，配合上由地政總署所提供嘅地圖，從而可即時得悉自己身處何地；而採訪時，筆者曾乘坐裝有CarPC系統嘅汽車，到達滿布高樓大厦嘅太古城作實地測試，結果發現系統仍能正常運作，就算將車子駛到較偏僻嘅避車處，系統嘅接收能力仍然未受影響㗎。
另外值得一提嘅係，呢套系統所使用嘅地圖及資料庫，係每半年至一年更新一次，以確保資料準確無誤；而用作收發信號嘅衞星，更係屬於民用衞星，所發出嘅資料更係完全免費。加上佢用上TouchScreen嘅操作模式，故此使用時可謂十分方便。
除上述用途外，呢套系統更可從地圖中搜尋出附近位置嘅酒樓食肆、油站及警局等資料；另外系統更備有無線鍵盤、CDROM及USB埠等等，從而可將車廂變成流動辦公室，又或者利用車內嘅6.4吋螢幕觀看VCD，甚至係透過備有上網功能嘅手提電話，與CarPC連線上網瀏覽網頁都得㗎。
售價：$14,800（不連安裝）
產品提供：康碼國際（28110839）