松司長自三月六日後，馬不停蹄，見盡傳媒界，電台電視上齊，重打埋校友溫情牌，返母校做騷，借與師弟妹對話之便，傳遞（一）預算案訊息；（二）港大生要講英語，英語對香港好重要嘅訊息；（三）唱《獅子山下》，十分親民嘅溫情訊息。
做完咁多場節目，松司長民望果然上升，直逼曾蔭權；曾司長亦識得搶鏡頭，及時「選擇性」地見友好傳媒（有《蘋果》份），霸番一啲報紙篇幅，大講「精快儉」。不過佢其實應該講祖國大躍進時嘅四字真言──多快好省──先至啱，「精快儉」唔好讀，意思唔清楚，如果曾司長能夠帶領公僕做事多，做得快，做得好，兼夾省錢儉用，我哋應該選佢（其實係八百人選佢）做第三屆特首。講番特首，特首謝票，理應佔去部份報紙頭版，點解曾司長會搶風頭，同日見報㗎！
大記者唔知喺邊度聽番嚟，話畀我哋聽，松司長整份預算案嘅出爐編排，一切公關活動都經精心安排，事先喺行政會議討論過，所以阿松呢次頻頻得分，啲行政會議成員覺得好滿意喎。
咁講法，即係以後啲高官（局長級）有乜大件事推出之前，都可能以松司長為師，學習整套公關安排，務求營造社會氣氛，利用民意去消除（neutralize）立法會議員反對嘅聲音。不過學習松司長，難度好高，既要技巧，又要真心全情投入，唔係純粹做戲，你估話咁易咩。松司長珠玉在前，成為示範單位，局長們豈會唔頭痛。