李嘉欣擔任歐萊雅護膚品代言人後，她的體態亦受到某品牌豐胸丸賞識，欲以千萬酬勞請她做代言人，但她對該產品沒信心，最後放棄厚酬拒接此廣告。
李嘉欣擔任巴黎歐萊雅護膚品的廣告代言人，昨日她與九四年泰國小姐冠軍、現為演員、模特兒、作家及講師的AreeyaChumsai，一起出席在銅鑼灣柏寧酒店舉行的美白新產品記者會。
李嘉欣表示：「我同歐萊雅嘅合作已踏入第二年，同呢個牌子重有一年合約，今年我都喺內地拍咗三個廣告，另外又推咗一個豐胸丸廣告，原本嗰個豐胸丸好畀得起錢，肯畀一千萬酬金，但我見過產品之後，見到個透明樽裝住一支針咁得人驚，所以我冇接到。」
每次接拍廣告之前，李嘉欣必定先了解產品質素，她說：「如果拍咗啲唔好產品，有人因為鍾意我，信咗去買嚟用，有乜事自己都唔安樂啦！所以我接廣告會好小心，唔會只向錢看。」對於羅兆輝早前不斷爆女星與富豪的情史，嘉欣表示：「以前羅兆輝係東方紅老闆，我幫佢間公司拍廣告，同佢都見過兩次，但平時冇乜聯絡，不過佢近期咁多新聞，我都有留意吓，每個人都有言論自由，佢講乜我冇意見，只希望佢早日康復。」
最近有一位患厭食症女子以陳慧琳和李嘉欣為奮鬥目標，多年前已開始地獄式減肥，昨日李嘉欣勸喻說：「為減肥搞成咁，唔值得，𠵱家佢重瘦過我，應該食番嘢。」
此外，張玉珊為免外間以為是修身堂找李嘉欣拍廣告被拒絕，昨日她在電話中澄清說：「我公司只贊助過李嘉欣部《豐胸秘Cup》，並冇搵佢拍廣告。」