戶外品牌以前就係俾人爬山用，唔專業人士都唔會用，但唔知幾時開始就有日本仔將戶外用品帶入潮流界，最出名自然有L.L.BEAN同埋Gregory，而一早已被日本仔捧上神枱之一的長毛象——MAMMUT，最近亦有代理返貨，以前下下過千，如今價錢就比之前平了一大截，不過貨量始終少，而返貨期又唔定，要入貨就要行多幾轉，想春夏換個AmericanStyle，可以去諗諗。
記者：馮彥彰 攝影：伍慶泉
瑞士Outdoor品牌Mammut，其實係專業行山品牌，唔係俾人出街用，之不過日本雜誌成日狂谷，係唔少鍾意AmericanStyle人士所追棒，可惜香港人未識貨，等到日本仔《Boon》講完又講，新宿人氣百貨店Beams推波助瀾後，《SMART》內SnapShot街頭照又狂影，先被港人發現，曾被炒的貨品靜靜咁係旺角有代理，價錢足足比日本平一大截！
買Mammut只會買佢一樣嘢，就係背囊！因為手工好，而且顏色靚，四季用都易襯衫，一個好手氣俾你搵到個歐洲製造的就更好！因為大部分已改由越南製造了，冇以前咁矜貴。不過話說回來，邊度造都用料特正，而且內有多格，睇睇行版有乜好貨先。
2002年冬天有排都重未到，但老闆好好人，靜靜將小量貨辦推出畀大家睇睇，當中以紅色最搶眼，預計九、十月會到貨，話唔定會有機會早到呢，大家要行多兩次睇睇。
長毛象Mammut（音：馬乜），來自瑞士，係專出爬山用品，原本只作專業用，但被潮流界人士着出街後走紅！由於外形特別，而且Logo長毛象又特別多人鍾意，所以日本價錢勁貴，之前香港都曾炒過一輪，但相信有代理後會好好多！Mammut一早由KasparTanner所創立，數數手指由創立品牌1862年到今，都有百幾年歷史，最初只係一家造繩廠，至1971年才開設第2家工廠，專門以現代技術開發攀山產品，Mammut最正係每件貨由紡紗到成衣都由佢哋公司一手包辦，每條線都經最嚴格品質管理，想唔好都難。
想知多啲可以去佢地個網站睇睇：
除了背囊，重有大量外套，Goretex風褸賣，不過香港天氣開始熱，相信冇乜人會再買褸，不如睇睇春裝，由衫到鞋都有，加上貨量唔多，唔怕同人撞衫。至於用料方面，同樣以針對戶活動為主，輕身及疏汗，買埋背囊真係可以做一個長毛象人。
長毛象大熱必定紅？點解，除了日本仔美國佬鍾意外，最緊要係嚟緊有相關電影上畫，好似嚟緊霍士就有套電腦動畫推出：《冰河世紀》，專講長毛象的，話說兩萬年以前，當冰河世紀還未正式來臨，大量動物南下求生。主角長毛象及朋友發現一個男嬰開始，當中少不了感人及緊張加煽情內容，如何合力度過難關，及一個又一個危機．唔知會否為長毛象產品殺出一條新血路呢。可以去網址（
毅成戶外用品
地址：旺角彌敦道518號彌敦行9樓B座
電話：23900020