中移動（941）宣布業績前回軟，拖累港股下跌，恒指噚日收報11210，跌93點，成交68.81億元，中移動則下跌1.6%，收24.95元。
中移動上次公布中期業績，因增長放緩而遭沽售，今次公布末期業績，市場憧憬佢會派息，但收購18省市業務尚未成功（連早前宣布8省市網絡嘅收購計劃都未搞掂），相信好難有息派。如果中移動肯象徵式派少少息，相信會對股價有頗大支持，管理層對股價變動相當敏感，唔知除咗派息外，重可以出邊招護價呢？
鈞濠集團（115）噚日遭凱基等多間台資證券行斬倉拋售，股價大跌76.7%，收0.159元，成交金額達1.05億元。據聞今次因為幕後缺水，所以連帶同系多隻股份亦應聲下跌，數字地球（109）及人人控股（059）分別下挫21%及12.5%。
黑客報料話，第一龍浩農業（875）將有收購動作，可能會配股集資收購國內農業業務。據聞近日已搵人四圍試盤，但似乎反應欠佳，加上鈞濠遭斬倉，更加難搵人要，不過相信幕後人士自有辦法，大家唔使擔心。
中策（235）宣布供股後，股價雖大跌35.9%，收0.25元，成交卻只得18.1萬元，反映市場根本冇貨沽，股價要升定跌，主要視乎揸𨋢人點玩。不過此股現時處於低位，可以酌量吸番些少，基本上唔會點蝕底，因為此股偶然會無情情大升，到時至追貨就已經太遲。