又一隻股仔被斬倉！鈞濠集團（115）勁跌，連帶成班二三線股都受牽連急跌，睇怕生性愛冒險嘅小初，呢幾日可以唞一唞。
經紀陳話，鈞濠公司本身冇事，今次出事嘅係外邊幫手嘅證券行，而且佢睇到鈞濠股價急跌至低位時，有唔少炒家出嚟狂接。
呢班炒家實力重唔差，佢哋喺鈞濠跌至11至12仙水平要咗唔少貨，所以鈞濠收市雖然仍跌76％，但以收市價15.9仙嚟睇，佢哋帳面已經賺咗唔少。
佢重話，上次惠揚控股（231）股價急挫，一樣有班炒家狂接貨，結果復牌連升幾日，所以佢同小初輸賭，如果鈞濠冇因為股價急跌被聯交所問話，或者要停牌嘅話，下周一可能有得升，但當然唔使旨意上返60仙水平。
至於有份幫莊，玩左手交右手嘅行家，經紀陳就話同情佢哋，經紀生意難做，明知做莊家盤高風險都要做，真係慘！