港股噚日下跌93點，技術上雖然重守住10日線（現處11143），但一周埋單微跌23點，就破壞咗周線圖連升3周嘅氣勢，其實有啲唔明點解好友棄守11233，唔通真係預咗下個禮拜出現較大調整？
中資股有好多消息係佢哋知你唔知，光控（165）噚日插水又係一個典型例子，雖然唔排除稍後會有補飛言論，但始終令人輸得唔順氣。滙證昨調降光控評級至減持，目標價由5.50元降至4.50元，的確夠快手。
講起唔順氣，禮拜三夜馬「超水準」告甩「新年代」，「新年代」馬主及有投注馬迷當然唔順氣，但連有錢收嘅「超水準」投注者都話勝之不武，就真係出奇，反映錢唔係大晒，馬會競賽董事唔可以指鹿為馬。趙飛雲唔相信賭馬係絕對公平，自己爛賭亦預埋呢層風險，但所謂寧畀人知，莫畀人見，馬會既然畀得直鏡巡邏影片大眾睇，在萬千馬迷之前，做判決就要合情合理，唔係話一句我係專業，你哋唔係就可以過關。