噚日係理工大學六十五周年慶典嘅開幕禮，請最威水校友梁振英。振英哥七四年喺理大攞咗高級文憑後，九八年理大又頒咗榮譽商業管理博士畀佢。振英哥回想七一年入讀理工前身香港官立高級工業學院時，校園又細，紅隧都未開，老師學生要爭住坐紅磡至灣仔同北角嘅小輪，當時「尖東」都「未出世」。
原來噚日重係振英哥好有意義嘅日子，九年前嘅三月十五日，梁振英同一班校友創辦「梁振英測量師」行，到今日合併成為戴德梁行主席，全球三十一個國家有一百二十間分公司，唔怪得理大要攬住呢個校友。
不過振英哥見到三位最老資格嘅理工三九年首屆畢業生，都要尊稱一聲「老前輩」。當中一位伍永康老先生，感念母校照顧，曾用每個鐘兩蚊請佢做助教，噚日重慷慨捐出二十萬畀母校。
﹙圖﹚三位三七年入讀理大前身香港官立高級工業學院的老校友聯袂而至，八十多歲高齡仍精神奕奕。
E-mail：