楊思琦、薛家燕、鄧萃雯、吳啟華、鍾景輝同鄭嘉穎，噚日喺電視城齊齊以一身白衫造型，幫無綫新劇《LovingYouII》拍攝宣傳片。
近日有人將佘詩曼同楊思琦比較，楊思琦話自己一啲都冇唔開心，佢話：「我睇到啲相都覺得幾似，我都希望自己嘅演技，都好似佢咁進步得咁快。」
問到楊思琦會唔會眼紅阿佘買咗架Benz，佢即刻反問記者話：「我冇眼紅佢呀！點解要用眼紅嘅字眼去講啫？反而我會戥佢高興。」
另外，噚日拍攝時現場重專登播咗啲音樂，導演叫家燕姐去幻想自己嘅初戀，家燕姐即講笑話：「叫我諗初戀，真係諗唔到呀！所以我一直去諗幾個仔女。」
而佘詩曼噚日喺尖沙嘴出席電影《情緣汽水機》開鏡禮，對於俾人話架新車係富豪送，佢話：「夾硬講都可以嘅，因為六叔係TVB老闆，我打佢工，我賺佢公司錢，咁佢係富豪，都算佢送啩！」
有傳任港秀會俾無綫雪藏至約滿，無綫方面噚日即刻否認，重聲明話仍未對任港秀有任何行動，任港秀依然係無綫嘅合約藝員，如果有適合佢演角色嘅話，都會起用任港秀。不過任港秀由歐洲返港後真係不愁冇嘢做，日前佢重拍咗個芬蘭浴廣告㖭！
有消息指王秀琳（Mango）同VRF其中一個成員拍拖，噚晚VRF一行四人去睇謝霆鋒個唱，記者問番佢哋呢件事，佢哋一聽到之後就你推我讓唔肯認。記者叫佢哋指出個嫌疑犯出嚟，三個成員就指住阿Raul（梁世豪），事後VRF解釋只係玩吓，佢哋同Mango只係朋友。
嫁咗去大馬幾年嘅張鳳妮，久不久就返嚟香港探吓朋友，馮仁昭知道嚟緊佢又會返香港探親。鳳妮嫁咗個大馬商人，又生咗個女，過緊少奶奶生活，原來佢又啱啱做咗第二任母親，又生多個女。兩個女對鳳妮嚟講梗係未夠數，因為佢理想係生番個仔。
楊凡導演前晚將佢執導嘅電影《遊園驚夢》入面百幾套戲服、道具，同埋電影嘅中、日版錄影帶送去香港電影資料館珍藏。佢話自己一直都有送同電影有關嘅嘢畀資料館，包括林青霞第一次試鏡嘅錄影帶，佢話唔會唔捨得，因為佢覺得資料館會好好保存佢呢批咁有價值嘅物件。
馮仁昭早排喺旺角潮流特區行街，咁啱撞到黃泆潼，佢同馮仁昭講話差啲俾人搶電話。嗰日黃泆潼將個電話擺咗喺衫袋，電話繩就突咗出嚟，行行吓佢覺得有人掹佢條電話繩，佢即刻喝住，咁先保住個電話。𠵱家搶偷都。