香港經濟回歸咁耐衰足咁耐，竟然同行政長官董建華點都唔肯搬離嘉慧園有關！堪輿學家陸毅噚日出席九龍西區扶輪社午餐會，講到本港風水同經濟發展嘅關係時，特別提到董特首作為香港嘅阿頭，住喺民居實在冇威勢兼唔夠貴氣，影響到佢自己嘅運就唔在講，重影響埋香港同港人嘅運勢㖭。
陸師傅重話，阿董唔肯入住嘅禮賓府（即係前港督府），風水布局其實好到不得了，因為該府坐落喺本港主龍脈之上，龍脈由太平山開始延伸而下，禮賓府位置正好喺正落脈吉穴，啲貴氣「彭彭聲」咁湧埋去，有權有勢又有運。唔單止咁，即使阿董唔肯入住禮賓府，都好應該搵個好地方起番座官邸，而中環添馬艦就係一個唔錯嘅選擇。添馬艦除咗位處本港心臟地帶，以前有英軍鎮守過，𠵱家重有啲氣勢剩喺度，點都好過住嘉慧園咁話！
講開陸師傅，佢成為堪輿學家嘅過程都幾傳奇，話說佢當年喺左派香島中學讀書時，一啲都唔迷信，六七暴動嗰陣，曾經因為幫師弟師妹出頭同警察發生衝突，因而入獄一年，畢業後喺香島教咗十年書，直至七九年時突然胃出血，老婆又失業，愈諗愈唔明點解咁辛苦做嘢，得嚟咁嘅結果？於是轉而研究風水命理，慢慢幫人睇埋風水，早幾年重喺中大開班授徒。
E-mail：