個市軟軟哋之時，例牌有啲避風股硬硬哋，例如地鐵（066）、港交所（388）、中電（002）等。
地鐵唔覺唔覺，升25仙，收11.50元。同911前比較，仍然落後大市好多。
地鐵有兩隻Call輪9146同9207，前者升8%，後者升3%。兩隻都差唔多平水，要埋手，應該揀9207。
9207現價21.2仙，溢價0.6%，槓桿率5.4倍。數據靚之外，就係明年4月先至夠鐘，壽命超過1年，冇乜理由好似末日輪咁，咁快冇晒溢價。
政府財赤大，希望賣多啲地鐵股份套錢，相信會有較筍嘅計劃注入地鐵，而唔係注入九鐵，令地鐵股份吸引，容易去貨。用咁嘅邏輯去度，地鐵股價重有得升，有挑戰12.10元嘅機會，9207有機會跟住升6-7仙。
大市消化緊，中電升20仙，Call輪9171收21.5仙，升0.4仙，唔夠。隻輪9月到期，負溢價1.6%，槓桿率高達14.4倍。就算計埋中電1.05元股息因素，溢價都只係1.9%，有咁高嘅槓桿率，隻輪好偏低。