大市好似有些少暗湧，淡友近日以盈富基金（2800）發售數額及遠期港滙轉弱做文章，似有出擊之意。不過美股喺本周五三重結算，前晚杜指認真好腰力，臨尾都可以倒升21點，睇嚟好友要保住勝果，亦對港股有利，但下個禮拜就要小心啲。
中資股升浪認真短癮，可能同大市氣氛轉淡有關，但真正有實力嘅紅籌股就繼續升。上海實業（363）噚日逆市升3%，收16.40元。技術上，上實升破2001年2月13日高位16.10元，走勢出現重大突破，如果能夠守穩16.10元之上，將再展大升浪。
另一方面，上實由舊年9月20日低位9.25元反彈至今，從未出現過明顯調整，以噚日收市價16.40元計，累積升幅達77.3%，一旦出現獲利回吐，沽壓將相當大。50日線（現處15.30元）係好淡關鍵，無論長揸或短炒，跌穿都要先計數。
新世界基建（301）延期公布業績，市場經驗通常唔慌好，所以噚日大跌4%，收2.35元。由於預計新基業績可轉虧為盈，加上噚日沽壓唔算太大，趙飛雲決定睇多兩日，跌穿2.30元先投降。