港股反覆偏軟，恒指收報11217，下跌56點。投資者除咗觀望港滙有冇俾人狙擊外，重留意今次盈富基金（2800）發售額會有幾多。雖然最近大市成交較活躍，但可惜焦點落喺國企股，而美資流入嘅錢又按兵不動，令噚日成交縮減。
據聞外滙基金投資公司原本想將盈富基金發售額回復至120億元，但驚大市頂唔住，所以今次只會酌量增加至60億元。911事件後，盈富發售額降至10億元，今年首季增至30億元，下季若只加碼至60億元，則要再賣多年幾，才可將官股售罄。
3間前日配股嘅公司噚日股價都大幅下跌，其中新奧燃氣（8149）同佑威國際（627）重跌穿埋配股價。新奧批1.1億股，每股定價3.05元，集資超過3億元。佑威配售1.2億股，每股0.69元，集資超過8000萬元。明日國際（760）則配售1.78億股，每股0.15元，集資額約2000萬。一日內3股抽水超過4億元，大市都咪話冇壓力。
通常批股都係圍晒飛，大戶因此肯要貨，同時會有不成文禁售期，即使要沽貨亦會好克制，最多賺個折讓差價就算，甚少會畀股價跌破配股價，今次新奧與佑威都算有少少失控。
不過Cookie話，佑威有料到，遲早會挾番轉頭，幕後玩家來頭不小，而且市場上貨源不多，幕後又未開始散貨，可以伺機撈底，等搭順風車。明日國際雖然未跌破配股價，但此股向來唔活躍，可炒程度相當低。
飛達控股（1100）噚日停牌，聽講會配股集資買嘢，此股最近已乾升至相當高水平，現水平配股，後市可能似佑威出現震倉。小心，小心。