大市繼續調整，但幅度輕微，恒指最低亦僅落到11185，收市11217，跌56點，成交75億元，期指略為轉強，收11170，低水收窄到只有47點。
今個升浪，恒指由10387起步，升上11381，共上升994點，以回落升幅的0.236和0.382計，恒指分別可見11146及11001，估計今次調整可在未來兩三日內完成，目前10日線（10983）已升越50日線（10963），恒指11000水平支持力應經得考驗。
不過，噚日同芬佬傾開，佢話呢兩三日，有一班人累積緊淡倉，部署完成後，就會利用手上嘅現貨，推低個市，目的係準備食埋盈富基金（2800）第2季推出嘅貨。消息來源幾可靠，又幾合邏輯，若果冇對手，則佢哋質穿11000大關後，走勢轉劣，恒指起碼會跌多幾百點。不過，若然盈富只係有限量地推出，即係話30億元之內，則影響唔會太大。
大市中期已確認見底，所以無論今次調整幾多，第2季都會係大升市，恒指預計可升到13400水平。筆者仍保持一貫嘅看法，就係第3季調整，第4季上升，年底前恒指有機會見14500至15000。今年應該會有兩個大升浪，可部署較為進取嘅入市策略。
3隻做「披成」嘅股份都大跌，佑威國際（627）、新奧燃氣（8149）和明日國際（760）跌幅都逾12%，除明日國際仍能穩守配股價外，其他兩隻都跌破，佑威嘅表現尤差。
佑威配售1.2億股，配股價0.69元，比前收市價0.72元僅有輕微折讓，但在跌穿配股價後，竟插到0.62元收市。跌得咁急相信係同近期累積升幅太大，周街都係獲利貨有關。佑威今次配售，國務院屬下嘅華源紡織接咗大部分，流出街嘅唔多，今次借配售調整，應係低吸機會，公司發展前景樂觀，中長線看好。