英國《星期日快報》評選出世紀三百大美人，排榜首的是玉婆伊莉沙伯泰萊。泰萊是誰？肯定考起新人類。如果告以玉婆歲數已達古稀，後生仔一定報以噓聲，覺得英國佬選個老祖母做靚爆鏡冠軍，簡直是開豬扒大玩笑。三百個入圍「靚女」，爭議頗大，部份確係超級老餅。試試閱讀排第七位的碧姬芭鐸的芳容，今時唔同往日，BB小野貓已是皺皮老虔婆。同齡而排第五位的蘇菲亞羅蘭底子厚，深得家鄉extravirgin橄欖油滋潤，是少數太婆級美人，勝在老娘夠騷，但近鏡依然不敵歲月消磨，不敢恭維。
上榜佳麗還有歌手Cher雪兒，排名122位。係，冇睇錯，年年遭時裝界惡評為地球人妖的雪兒，全身上上下下動過近百次整型手術，夜晚上街，隨時會被人誤認作米高積遜！排163位的薛歌妮韋花，演《異形》特別入戲，你明點解。居然能上美人榜，相信是評審團之一的BoyGeorge徇私博懵。佐治童子跟花姐，型格面相儼如番鬼Twins，好姐妹出術畀高分，不在話下。
各花入各眼，審美這碼事，可以借用外長唐家璇反擊美國那句「單邊主義」。單眼佬睇靚女，隻眼開隻眼閉，當然無譜。香港選美活動頻繁，但遭羅兆輝踢爆，所謂三甲佳麗，原來跟三陪小姐無異。賣肉不代表樣衰，眾八字胸女星一樣有機會上靚女榜。而跟雪兒、花姐同樣愛高姿態曝光的保安局長，常以型人裝扮出現，排名應該高幾個馬位。後者至低限度，沒讓你聯想起alien嘛。