本港經濟低迷，失業率高企，北上創業已成為港人的新趨勢。就像今日介紹的深圳寵物城，便正做得熱熱鬧鬧，不少港人都在那兒賣寵物，只要拿出約二十多萬資本，便能在那裏開業，你又有興趣試試嗎？
記者：劉健雄 攝影：黃子偉
40歲的蘇強，以前是在大陸開夜總會的，因為想從璀璨生活回歸平淡，才嘗試於一年前搞寵物店。
「全深圳都知寵物城㗎啦，養狗嘅人都會嚟呢度買嘢。我喺呢度開舖係因為貪佢舖租平成起碼六成，人工都係香港嘅一半，檢疫尺度又比香港嘅寬鬆。另外深圳地方較大，我舖前有一大塊空地，所以每日朝早我都會叫工人帶啲狗出去跑步，如果喺香港，根本無可能咁。最重要係所有牌照都由寵物城包辦。」豪氣十足的強哥說。
「我賣嘅狗比香港嘅大型好多，如洛威拿、金毛尋回犬、斑點等，啲客就最鍾意買金毛尋回犬，因為佢夠溫馴。可能由於生活水平高咗好多，好多男人都會買狗送畀女朋友，有啲就用來炫耀一下自己，亦有啲係因為寂寞有個伴。」
眼見賣狗生意好搵，強哥都會做埋寵物美容，提供更全面嘅服務，如剪毛、沖涼和修甲等，「不過我嘅主力都係賣狗，因為利潤會比較多。」他說平均每月可賣出五六隻狗。
37歲的阿Ray認為現今香港經濟環境太差，感覺沒有甚麼作為，再加上他向來愛狗，家族兩代都有繁殖狗隻的經驗，便毅然嘗試上大陸博一鋪，開了一間名為「名犬地帶名犬屋」。
他認為位於深圳黃貝嶺的寵物城，是近年港人和內地人買寵物的首選之地，專門售賣各樣名種狗，還有一間動物醫院，設施和水準追得上香港。
「我自己本身很愛狗，喺香港，好難搵到咁大地方去養大狗，但喺深圳，我就養過一隻聖班納犬，身長都足足有五呎……𠵱家深圳有好多有錢人，佢哋都好捨得畀錢買狗，但就未必識養。大陸人養狗同養豬無乜分別，只會用磚頭叠起做成圍牆便算，狗嘅糞便只會用水沖走，於是我覺得應該把香港養狗嘅知識帶上大陸。」
就憑着這一腔熱誠，阿Ray在年多前，便到黃貝嶺這個有意開發寵物天堂的地方開張作業。「我記得當初開張時，買了12隻狗，但不久便死了11隻，我諗係因為細狗嘅體質較弱，只要一隻有事，其餘嘅就好快會受感染。」現時他所賣的狗種類繁多，全是從香港、台灣和澳洲入口，其中最受客人歡迎的是金毛尋回犬（約?4,800-?30,000）、拉布拉多犬（約?4,000-?10,000）和史納莎（約?3,000-?10,000），價錢較香港平兩成。
顧客中六至七成是香港客，其餘的便是內地人和外籍人士。
「當初嚟到呢個商場，根本無乜人知有呢個地方，而業主就喺電視台賣廣告同準備ShuttleBus接送；我還到處貼街招，總算都有人見過走嚟幫襯。」就這樣阿Ray默默無言地守咗半年，直至愈來愈多寵物店在此經營，而商場的名氣亦愈來愈大，吸引不少客人到來看看。
－工商登記（當地工商行政管理局申請）
－稅務登記（當地稅務局申請）
－驗資登記（當地認可會計公司申請）
香港城市大學法律學院助理教授顧敏康表示，在內地經營狗店除需齊備以上牌照外，還需具備消防、環保、檢疫和衞生批文，手續繁複，加上港人獨立申請不易獲審理，最好還是由商場代為申請較容易。狗隻在大陸均需領有防疫證，類似香港狗牌，也需注射防疫針，每支約?180，皆由買家負責。